د. مي القط تكتب: التربية.. رحلة نحو السواء النفسي

Oct 22, 2025 - 04:26
د. مي القط تكتب: التربية.. رحلة نحو السواء النفسي

كتير من الأمهات بيسألوا:

“هو أنا عايزة أوصل بإبني لإيه؟”

هل الهدف يكون مؤدب؟ ناجح؟ متفوق؟ محبوب؟

كل دي أهداف كويسة، لكن الحقيقة إن “الهدف الأعمق” للتربية هو إننا نربي إنسان سوي نفسيًا.

فاولا ما معنى السواء النفسي عند الاطفال؟

يعني ابنك يعرف نفسه، ويقبلها، ويتعامل مع العالم من غير خوف أو إحساس دائم بالنقص.

يعرف يقول “لأ” وقت ما يحتاج،

ويطلب المساعدة من غير خجل،

ويغلط ويتعلم من غير ما يجلد ذاته.

السواء النفسي مش بيتبني بالأوامر،

بيتبني بالعلاقة.

بعين شايفة ابنها مش بتقارنه،

وبقلب يسمع قبل ما يحكم،

وبتربية فيها توازن بين الحزم والحنان.

لما الأم تبطل تسعى وراء “الابن المثالي”

وتبدأ تدور على “العلاقة الصحية”

بتبدأ أول خطوة حقيقية نحو السواء.

التربية مش سباق،

هي رحلة فيها صبر، أخطاء، محاولات، ووعي.

كل مرة بتتراجعي فيها عن صرخة وبتختاري الحوار،

كل مرة بتخدي بالك من مشاعرك قبل ما تفرغيها في ابنك،

كل مرة بتسمعيه وهو بيحكي عن خوف أو فشل،

اعرفي إنك بتزرعي بذور السواء النفسي.

الطفل السوي مش اللي ما بيغلطش،

لكن اللي لما يغلط يقدر يقوم تاني،

ويفضل شايف نفسه “قَدره وقيمته” رغم كل حاجة.