د.حازم الشاذلي يكتب: مأثورات المصريين في الحسد وخلافه

لعل شعبنا من أكثر الشعوب إيماناً بالحسد وأثره فى تسيير مقدرات حياته وطبعاً إذا ناقشت أحداً فى ماهية الحسد ودوره فلن يخلو الأمر من نظرة شذراً مع العبارة المألوفة الحسد مذكور فى القرأن.

ولشعبنا تقاليده الخاصة لدرء الحسد أصبحت بالنسبة لنا ماركة مسجلة لا ينافسنا فيها أحد وسأذكر هنا بعض الأمثلة.

صورة كبيرة لساق متجبسة تنشر فى الصفحة على فيس بوك وتحتها عبارة العين صابتنى ورب العرش نجانى.

العربية من أول خروجة اتخبطت واتدشدشت٠٠٠ مجرد خدش عادى بسيط أو

الواد فى البيت وحرارته أربعين.

البيت كله جات له شوطة كورونا ٠٠٠ برد عادى أصاب الوالد

الواد الأخير ده جه غلطة والله ٠٠٠ يسبقه أربعة أو خمسة

لا مانع من إخفاء عدد الأنجال الحقيقي أو إضافة الرقم خمسة بمناسبة وبدون مناسبة.

من ساعة ما سكننا فى البيت الجديد واحنا ما بنبطلش خناق مع بعض ٠٠٠ أصلاً هما كذلك من بداية الزواج.

جوزي سافر السعودية بعقد مؤقت بألفين ريال أحسن ما نموت من الجوع هنا ٠٠٠ مرتبه ثلاثون الف.

عبارة تكتب علي الميكروباص ماتبصليش بعين رضية شوف إيه اللي اتدفع فى

وممكن أيضاً الحلوة دي خوخة جت بعد دوخة.

وأيام أزمة الكهرباء

 الكهربة قطعت عندنا إمبارح عشر ساعات والتلاجة ضربت والأكل كله رميناه في الزبالة ٠٠٠ الكهرباءقطعت نصف ساعة والثلاجة سليمة 

أما عن المواقف واللزمات الحديثة للخروج من المواقف المحرجة والأزمات وخلافه فحدث ولاحرج.

حبيبي يا باشا إزيك ٠٠٠ هو لا يتذكر إسمه.

والله العظيم فى بالى ولسة كنت حاكلمك حتى إسال عزيزة مراتى٠٠٠ لم يخطر على باله قط

كلمتك كذا مرة وأنت مارديتش على٠٠٠ ممكن كان فى الحمام أو نايم.

والله كلمتك كذا مرة عشان أعزمك فى الفرح لقيتك غير متاح٠٠٠ كان ممكن تحاول مرة أخرى.

فينك يا عم انت ما بتسألش ليه ٠٠٠ هو اللي ما بيسالش.

انت بتقفل موبايلك ليه ٠٠٠كاذب لم يحدث.

السيستم واقع يقولها الموظف عندما يريد أن يتناول إفطاره.

الموبايل فاصل شحن يقولها الأولاد لتبرير غيابهم فى أماكن غريبة.

أنا عيبي إني طيب وحقانى واللى فى جيبي موش لى ٠٠٠ وهو يأكل مال النبى.

هو نبيه جداً بس مالوش خلق على المذاكرة يقولها الأباء لتبرير غباء عيالهم.

جيل ما يعلم بيه إلا ربنا يقولها كل جيل عن الجيل الذى يليه.

العريس قمر والعروسة قمرين تقال فى الاأفراح بينما العروسين نسانيس أو على الأقل واحد منهما.

انت ما كلتش حاجة هو أكلنا مش عاجبك تقال للضيف بينما يكون هو قد التهم نصف المائدة شعب كريم ومضياف ومجامل.

والله يا دكتور ما بانام الليل يقولها المريض طمعاً فى زيادة اهتمام من الطبيب.

أنا بنتى دكتورة يقولها مريض طمعاً فى تخفيض أتعاب الطبيب.

رجلى مورمة يا دكتور يقولها مريض غالباً تاجر لطبيب أنف وأذن زبون عنده.

الورقه عند مدام عفاف وهى معتذرة النهاردة يقولها الموظف المكلف بتغطية مدام عفاف وهو أضاع الورقة.

تحريك الأسعار تقولها الحكومة لتجميل عبارة رفع الأسعار.

الخلاصة نحن شعب متميز ومبدع بالفعل.