مريم عادل الجندي لـ نبض الخبر: كنت متوقعة نجاح منتهي الصلاحية.. وشخصية نعمة زي أغلب الستات المصريات 

كتب: ياسر خالد 

تشارك الفنانة مريم عادل الجندي، خلال دراما رمضان 2025، بمسلسل منتهي الصلاحية، الذي يحقق نجاحًا كبيرًا منذ انطلاق عرضه خلال النصف الثاني من الشهر الفضيل. 

تواصل موقع نبض الخبر مع مريم عادل الجندي، التي حدثتنا عن كواليس المسلسل، وكذلك عن شخصية نعمة التي تجسدها خلال أحداث العمل.

مريم عادل الجندي: كل حاجة تؤدي إلى النجاح موجودة

فعمّا ما إذا كانت قد توقعت هذا النجاح الكبير لمسلسل منتهي الصلاحية، قالت مريم: كنت متوقعة من الفكرة ومن المخرج والمؤلف نفسهم، الاتنين عاملين شغل قبل كده هايل.

أردفت: فإني أتوقع، آه بصراحة حاجة متوقعة، الفكرة كمان جديدة والأبطال وكل حاجة تؤدي إلى النجاح موجودة.

عن رؤيتها لمناقشة قصة نعمة لقضيتين هما الرئيسية للمسلسل وهي المراهنات الإلكترونية، وكذلك العنف الأسري، كشفت: أنا شايفة نعمة زي أغلب الستات المصريات عايزة تعيش وتربي عيالها وبتحب جوزها، وخسرت علشانه كتير علشان تبقى معاه، دي الشخصية.

تابعت مريم: الموضوع إنه دخل في سكة المراهنات، اللي هي ماتعرفش عنها أصلًا حاجة، بدأ يغير منه ويخليه يتجه للعنف، وهي برضو بتستحمل حبًا فيه حبًا في حياتها تمسكًا بالعيلة وإن تفضل مع عيلتها.

موضحة: هو اتغير طبعًا بسبب المراهنات، هو ماكنش أصلًا كده، ده تأثير المراهنات والخسارة عليه، ده غير حياتهم قلب حياتهم، أنت لسه كمان ماشفتش باقي المشاهد، فده هيغير تمامًا من حياتهم اللي هما عايشينها.

مريم عادل الجندي: كلما الموضوع كان مثير للجدل وشيق ويشد، هتلاقي الناس رايحة تتفرج على العمل 

حول ما إذا كانت الكيميا بينها وبين المخرج تامر نادي والسيناريست محمد هشام عبيّة، قد زادت بعد تعاونها معهما للمرة الثانية على التوالي في منتهي الصلاحية، بعدما تعاونوا بمسلسل صلة رحم في رمضان 2024، أكدت: الكيميا طبعًا زادت والأريحية زادت.

مشيرة: إحنا عرفنا بعض أكتر فعرفنا إزاي نشتغل مع بعض وعرفنا نفهم بعض أكتر، وبصراحة مكسب كبير أوي ليا، أتمنى أشتغل معاهم أكتر وأكتر.

أضافت: الاتنين ما شاء الله عليهم أسامي كبيرة وناجخين وبيهتموا بشغلهم لأبعد حد، مبسوطة جدًا إني اشتغلت معاهم تاني، وأتمنى يتكرر أكيد.

عن إثارة صلة رحم ومنتهي الصلاحية للجدل، وما إذا كانت إثارة الجدل مطلوبة في الدراما، أوضحت: إثارة الجدل جزء من الحبكة، هي مطلوبة قصدك كنوع من البروباجندا أو تشد الانتباه؟، أكيد آه، كلما الموضوع كان مثير للجدل وشيق ويشد، هتلاقي الناس رايحة تتفرج على العمل.

أكملت: بعد كده تفهم العمل ده إيه بيقدم حاجة ولا بس بروباجندا على الفاضي، والحمد لله معانا السيناريست مابيقدمش حاجة على الفاضي.

واصلت: فالفكرة مثيرة للجدل، أنا مش بس شايفاها مثيرة للجدل، أنا بالنسبة لي الموضوع كان جديد جدًا أنا ماعرفوش، ولما عملت سيرش ودورت لقيت إن ده حاجة منتشرة جدًا عندنا في مصر.

لفتت: فبقيت مبسوطة إني بوعي، جزء من توعية الناس عن حاجة زي دي، حاجة خطيرة موجودة مع الشباب مع الأطفال، بيلعبوا على فلوس وعلى حاجات كبيرة تودي في داهية، فالموضوع مش بس إثارة جدل أنا بصراحة شايفاه أهم من كده بكتير.

مريم عادل الجندي: عمرو القاضي وهبة مجدي ودنيا ماهر متعاونين جدًا ومبسوطة إني اشتغلت معاهم

بخصوص تعاونها مع الفنان عمرو القاضي، خصوصًا ان أغلب مشاهدها معه، قالت: أستاذ عمرو القاضي بصراحة ممثل تقيل وخبرة وإنسان محترم جدًا.

مردفة: انبسطت جدًا إني اشتغلت معاه استفدت منه كتير، متعاون جدًا ويضيف للي قدامه ويحاول يساعد، بصراحة انبسطت إني كنت معاه.

اختتمت الفنانة مريم عادل الجندي حديثها، متحدثة عن تعاونها مع الفنانة هبة مجدي والفنانة دنيا ماهر، حيث قالت: دنيا أستاذة هبة نفس الكلام، بصراحة متعاونين جدًا وإضافة لأي حد يشتغل معاهم ومبسوطة جدًا إني اشتغلت معاهم.