عظمة اللوح «تحذيرات من بيعها والسعر وصل لـ3 آلاف جنيه».. ومعالجون: تؤدي للموت البطيء
كتبت: نور التلباني
وسط الاستعدادات لعيد الأضحى، انتشرت مجددًا التحذيرات من عظمة "بيت اللوح" أو عظمة الكتف، واللي بقت مصدر قلق لناس كتير بسبب علاقتها بالسحر، بحسب أقاويل الجزارين والمعالجين بالقرآن ورواد السوشيال ميديا.
إيه هي عظمة اللوح؟
عظمة الكتف أو اللوح، هي قطعة عظمية مسطحة بيتم استخراجها من أجسام الأضاحي، وبحسب معتقدات منتشرة، بيتم استغلالها من قِبل الدجالين في كتابة طلاسم وأعمال سحر سفلي، وغالبًا بيستخدموا الحبر عشان يكتبوا على الجانبين، وبعدها يدفنوها في أماكن مهجورة أو داخل المقابر.
3000 جنيه تمن العظمة الواحدة!
كشف أحد الجزارين في تصريح صادم:
"في ناس كانت بتيجي تطلب مني عظمة اللوح بـ1000 و3000 جنيه.. بس أنا برفض أديها لهم، علشان بيتعمل بيها سحر مؤذي."
وأوضح إن الطلب بيجي غالبًا على عظمتين: واحدة من العجل، والتانية من الخروف، ولازم تتكسر أول ما تتنضف، عشان ما تتاخدش وتُستخدم في الأذى.
ليه الستات هما الأكثر طلبًا للعظمة؟
قال جزار تاني وشارك في حملات تطهير المقابر في إدفو:
"العظمة دي بتطلبها الستات أكتر.. وبيتقال إنها بتستخدم في إذلال الرجال، والسيطرة على الحبيب، وتدبير الحوادث، وحتى الموت البطيء."
الشيخ إبراهيم شهاب يحذر: دفنها بيتم في المقابر وأماكن مهجورة
المعالج بالقرآن، الشيخ إبراهيم شهاب، أكد إن العظمة دي فعلاً بيتم استخدامها في أعمال السحر، وإنه بيستقبل حالات متأثرة بها وبيظهر عليهم أعراض زي الضيق، النزيف، أو الأمراض الغريبة، وقال:
"كل حالة لازم تتشخص لوحدها.. مش كل سحر شبه التاني."
المجلس الأعلى للشؤون الإسلامية: الإيمان بالسحر "شرك بالله"
الشيخ عبد الغني هندي، عضو المجلس الأعلى للشؤون الإسلامية، استنكر هذه الظواهر وقال:
"المؤمن بهذه الأمور مشرك بالله.. ضرر النفس أعظم من هدم الكعبة، والمفروض كل شخص يحصن نفسه بالأذكار والعبادات."
تحذير للجزارين: اكسروا العظمة فورًا!
الحملة اللي ظهرت على السوشيال ميديا دعت الجزارين إنهم يكسروا العظمة دي بعد الذبح مباشرة، كنوع من الوقاية، خصوصًا إنها بقت مطلوبة جدًا في السوق الأسود للجن والسحر والشعوذة.
أصل الحكاية: بين الخرافة والحقيقة
رغم نفي الجهات الدينية واعتراضهم، لسه القصص حوالين "عظمة اللوح" بتتكرر كل سنة، خصوصًا مع قرب عيد الأضحى، في مزيج من الرعب الشعبي، والحكايات الغريبة، اللي بتخلي من عظمة بسيطة رمز للخوف والأساطير.
