خناقة على حجز ملعب كورة.. زينة تكشف تفاصيل هجوم كلب على نجليها
كتب: ياسر خالد
أجرت الفنانة زينة مداخلة هاتفية مع الإعلامي عمرو أديب ببرنامج الحكاية، تحدثت خلاله عن أزمة هجوم كلب على نجليها بأحد المجمعات السكنية التي يقيمون بها.
قالت زينة أن الأزمة بدأت عندما تركت نجليها بملعب الكرة التابع للمجمع السكني، ثم ذهبت لشراء بعض اللوازم من السوبرماركت على أول الشارع، قبل أن تفاجأ باتصال هاتفي من أحد نجليها حكى لها فيه أن طفلًا أطلق كلبه عليهما لإخراجهما من الملعب.
أوضحت زينة أن نجلها قال لها أن الطفل طلب منه وشقيقه أن يلعب في الملعب، فرفضا قائلين له أن حجز الملعب في ذلك الوقت لهما وأنه لو أراد فليلعب معهما، لكنه رفض لأنه يريد اللعب مع أقربائه، ثم أطلق الكلب عليهما لإخراجهما من الملعب.
أضافت أن أحد نجليها جرى عندما رأى الكلب، قافزًا من فوق أحد الأسوار مما عرضه لإصابات في ذراعه الأيسر، أما الآخر فظل واقفًا لأن لديه كلب ويعرف كيف يتعامل معه، ليحدث الكلب خرابيش في ساقه.
تابعت زينة أنها عادت مسرعة، لتجد نجليها عند أمن المجمع السكني في حالة رعب، ثم طلبت من مشرف الأمن الذي كان شاهدًا على الواقعة أن يريها ذلك الطفل، لتخبره أنها لن تتحدث معه لأنه مازال طفلًا صغيرًا وأنها تريد التحدث مع والدته.
أكملت أنها ذهبت إلى منزل الطفل للتحدث مع والدته، فانهالت عليها بالسباب قائلة لها أنها هي من قامت بسب ابنها لأنها قالت له العيب مش عيلك العيب على اللي خلفتك، وديني عندها لو سمحت، لافتة إلى أن زوجها حاول تهدئتها لكنها لم تكن تهدأ وواصلت الهجوم عليها بالسباب.
أردفت زينة أنها اتصلت بالنجدة مشيرة إلى أن وزارة الداخلية لم تتأخر أبدًا، فأرسلت سيارات نجدة ورئيس مباحث، متابعة: عملت بلاغ النجدة ورئيس المباحث قالي أنا هجيب الولد والناس والكلب ونطلع على القسم، عشان القسم لازم المحاضر دلوقتي تتكتب على الكمبيوتر، فحضرتك تجيبي الولاد وتيجي على القسم.
واصلت: فقلتله حاضر، اتصلت بأخويا ورحت على القسم، لقيت فيه 3 رجالة محترمين أنا ماشفتهمش في الخناقة خالص، بيعرفوا بنفسهم أنا النائب محمد الجارحي وأنا النائب هشام الجارحي وأنا النائب فلان الجارحي.
لتسألهم زينة: هو حضرتك ليه بتحط النائب قبل الاسم؟، لافتة: أنا حسيت مقصودة، قلتله مش محتاج شكلك راجل محترم فقول اسمك بس، أنا ماقلتلكش أنا الفنانة زينة اما زينة عادي، فقلتله لو سمحت اللي حصل خطر جدًا وحكيتله كل اللي حصل، قالي دول ضيوف عندنا، مضيفة: الضيوف يخدوا كلب ويخرجوا؟.
أشارت: هما كانوا في منتهى الاحترام والأدب، اعتذروا لابني، فقالولي خلاص ومافيش داعي لمحضر، قلتلهم بس تكتب تعهد إنه مايحصلش ده تاني، قالي من غير تعهد مش هتحصل تاني، قلتله معلش، قلتله ومش حضرتك اللي عملت كده في الولاد، ودي حاجة نفسية لازم الولد يعتذرلهم.
استكلمت: قالي الولد تحت في العربية، إحنا مابنطلعش ولادنا أقسام، قلتله ليه حضرتك ما أنا مطلعة ابني القسم وقاعد معايا ومعاه خاله وأنا أهو وأختي والناس عادي، والراجل رئيس المباحث مستضيفنا في مكتبه ومافيش أي تقصير في حاجة دول حضرتك هيبقوا رجالة مايطلعوا القسم عادي.
مردفة: معلش هنتعبك معانا تنزلي تحت وهنجيبلك الولد، وإحنا قاعدين قلتله معلش فين الست اللي شتمتني وفين جوزها اللي هما مسئولين إن طفل يبقى معاه كلب يا فندم؟، فقالولي تحت.
مضيفة: قلتلهم اشوف بطايقهم، كأنه سر يا أستاذ عمرو، لا بطايق طلعت، لا اتعرفت على أسامي الناس دي، لأ عرفت مين دول، بالصدفة عرفت إن الولد اسمه آدم لما نزلت تحت.
متابعة: نزلت تحت أستاذ محمد الجارحي جاب الولد قاله مش قصدي، قلتله حبيبي اللي بيغلط فيه كلمة مابيقلش مش قصدي فيه كلمة بتتقال لما بتيجي تعتذر، قاله أنا آسف، قلتله اسمه زين، قاله أنا آسف يا زين، قلتله شكرا يا حبيبي أنت ولد محترم.
مردفة: لقيت الأم فجأة فتحت باب عربيتها، لافتة: طبعًا أنا نزلت لقيت بلدهم كلها تحت، لقيت شعب تاني بناس تانية تحت، مضيفة: تاعبين نفسهم أوي وجايبين ناس كتير أوي علشان يخوفوني مثلًا؟.
مواصلة: الست راحت نزلت ماتعتذرش يا آدم، اوعى يا آدم تعتذر، اوعى يا آدم، قلتلها حضرتك هو اعتذر واللي بيغلط بيعتذر، قالتلي أنتي مريضة نفسيًا يعتذر لمين؟، وهاتك يا شتيمة تاني، نفس اللي حصل ولا قلم زاد ولا قلم نقص، نفس اللي السيناريو وحضرتك فيه كاميرات.
مكملة: الكاميرات بقى حضرتك المفروض المسئول إنه يجيبها، طبعًا النيابة هتجيبها، هما قالوا إن مافيش كلب يبقى مافيش كلب يا فندم، فجأة المحضر اتحول لمحضر إداري، محضر فيه كلب، قلتلهم أنا مش هتنازل، قالولي هنعمل فيكي محضر لو ماتنازلتيش.
كشفت زينة عن علاقة السيدة بالسادة النواب، قائلة: علاقتها إن المدام طلعت بنت عمهم ومتجوزة ابن عمهم، اسمها حاجة جارحي.
استكملت: وإحنا فوق في القسم حضرتك لقيت إنه أنا بقوله سيادة الرئيس مطلع قانون مخصوص ومتصدق عليه قريب عشان موضوع الكلاب والأطفال، فراح قالي إحنا اللي بنكتب القوانين، قلتله بتكتبوا القوانين لعامة الشعب اللي زينا والقوانين دي مابتمشيش على حضراتكم؟.
مكملة: قالي لأ أنا ماقلتش كده، بس القوانين دي إحنا اللي بنطلعها، قلتله وحضرتك أول واحد هتتحاسب بالقانون أنا آسفة.
عما إذا كانوا قد حرروا محضرًا ضدها هي أيضًا، قالت زينة: عملولي محضر إني رايحة أتهم ناس إنهم شتمونا واتهجموا بكلب على ولاد صغيرين عزل بيلعبوا في ملعب كورة جنب بيتهم في الكمبوند اللي هما ساكنين فيه بقالنا من 2016 يا أستاذ عمرو.
مستكملة: فجأة طلعوني إني متهمة وإني جريت ورا طفل بعربية، موضحة أنا كنت بجري عشان أجيب فرد الأمن، مضيفة: عملت المحضر للولدين واتحولت على مستشفى الشيخ زايد وعملت كشف على الولدين.
تساءلت زينة: إزاي كلب متوحش بالحجم ده يمشي مع طفل في ملعب بتاع كورة، اللي أصلًا كله أطفال، وكلب مش مرخص وبيهجم على ولادي ومعاهوش كمامة وبالشكل الشرس ده، المفروض إنه يعور ابني وينط عليه ونستنى لما تحصل مصيبة.
ثم أضافت: فين مسئولية الأب لو كان الكلب قتل ابني ولا عضه حتى زي طفل الحادثة المشهورة اللي حصلت قبل كده؟، أنا كنت أعمل إيه ساعتها حضرتك؟.
اختتمت زينة تصريحاتها قائلة: أنا عايزة حق ابني، ويطالب حضرتك إن يكون فيه شفافية ويجيبوا الكاميرات من جميع الزوايا، إحنا في دولة قانون أنا ماعنديش أدنى شك بإني هجيب حقي وحق ابني بالقانون، أنا اتوعدت آخد حقي بالقانون.
آخر أعمال زينة
من ناحية أخرى كان آخر أعمال زينة مسلسل العتاولة 2 مع الفنان أحمد السقا، الفنان طارق لطفي، الفنان باسم سمرة والفنانة فيفي عبده، الذي عرض خلال ماراثون دراما رمضان الماضي ولاقى نجاحًا كبيرًا.
أحدث أعمال زينة
الجدير بالذكر أن الفنانة زينة تنتظر خلال الفترة القادمة عرض فيلم جديد مع الفنان أحمد مجدي بعنوان بنات الباشا، الذي يعيدها للسينما بعد غياب طويل عن الشاشة الفضية، كما تتعاون من خلاله للمرة الثانية مع مجدي بعد تعاونهما من خلال مسلسل لأعلى سعر مع الفنانة نيللي كريم والفنان أحمد فهمي، الذي عرض خلال ماراثون دراما رمضان لعام 2017.
