نوران ماجد لـ نبض الخبر:«أهل الخطايا بيناقش قضايا مهمة جدًا وفيه رسالة للناس.. وكنت عايزة أعمل حاجة تبين تمثيلي»
كتب: ياسر خالد
تألقت الفنانه الشابة نوران ماجد من خلال شخصية راما التي جسدتها بمسلسل أهل الخطايا، الذي عرض خلال ماراثون دراما رمضان الماضي ولاقى نجاحًا كبيرًا، ونالت عنها إشادات واسعة وردود أفعال إيجابية من جانب الجمهور.
قد تواصل موقع نبض الخبر مع نوران ماجد، التي كان لنا معها هذا الحوار الممتع والشيق عن كواليس أهل الخطايا وتفاصيل تجسيدها لشخصية راما، فإلى نص الحوار...
هل شعرتِ بالقلق من أن يكره الجمهور شخصية راما في أهل الخطايا؟
أهل الخطايا بيناقش قضايا مهمة جدًا وفيه رسالة للناس، بالعكس أنا كنت عايزة أعمل حاجة تبين تمثيلي من بعد ولاد رزق فده كان أنسب دور، لأنه دور مركب شيطانة بتتحول لشكل إنسانة علشان تنفيذ مهمتها، الناس أكيد بتكون فاهمة إنه تمثيل.
حدثيني عن المشاهد اللي جمعتك بـ محمد ثروت خاصة أن معظم مشاهدك معه.
إنسان محترم جدًا على المستوى الإنساني والمهني واتعلمت منه أكيد حاجات كويسة.
واتعاملت برضو مع أستاذ جمال سليمان، وكان من الناس العظام ومحترم ومقدر الصغير فى اللوكشين قبل الكبير واستفدت منه كتير.
ما هو أصعب شيء في شخصية راما؟
إنها مش إنسانة، وأنا بذاكرها مع أستاذ رامي الجندي أنا مكنتش عارفه أى حاجه عن العالم ده، فقرأت القرأن وطلعت منه حاجات علشان أعرف شوية وأنا بذاكر راما، لما كنت بدخل فى راما كان فيه إحساس غريب مش بحسه هو الخوف، واكتشفت على قد إن الإحساس الخوف ده وحش عند البنى آدم، بس ليه متعة تانية إنك بتخاف على حاجات كتير، فده بيحافظ على الإنسانية جوانا.
حدثيني عن مشاركتكِ في عمل به كل هذه الكوكبة من النجوم.
أنا بعتبر نفسي بنت محظوظه جدًا إني فى وقت قصير اتعاملت مع كل النجوم دي واتعلمت منهم كمان جدًا، كل شخص اتعاملت معاه علمني كتير، ومش بس النجوم المخرجين وكل الناس اللي بتبقى فى التصوير.
هل تشعرين أن باسورد تمت مشاهدته بشكل أكبر عندما عرض على التليفزيون خلال النصف الثاني من رمضان؟
للأسف أنا مش متابعة علشان طول الوقت بذاكر، بس إن شاء الله يكون اتشاف بشكل أكبر، بس أنا كنت جزء بسيط أوى فيه وده كان تصويره قبل ولاد رزق بكتير، كنت لسه عايزة أعمل أي حاجة تجيلي علشان أوصل لحلمي.
كيف أحدثت مشاركتكِ في ولاد رزق 3 فارقًا بمشواركِ الفني؟
خلتنى عندى ثقة أكبر بكتير وخصوصًا بعد ماشوفت إن الناس حاباني، وهو ده العائد إلى أنا عايزة بس.
ما الأعمال التي تحضرين لها خلال الفترة القادمة؟
بحضر لحاجة بره مصر إن شاء الله، وبعد كده فى كذا عمل بقرأ الورق بتاعه الأول وبعدين أقرر، علشان أنا دايمًا عايزة أقدم للناس حاجات مختلفة وتعجبهم وتكون فيها رسالة ويستفادوا منها، وأنا لسه برضو في أول طريقي ولسه بتعلم.
هل شعرتِ بالقلق أن تتم مقارنة أهل الخطايا يتقارن بـ المداح بعض الشيء؟
لأ أنا دايمًا بقول كل عمل ليه طعم مختلف، مفيش حد شبه حد.
