مي القاضي: ماشوفتش هدى الإتربي ومافيش بينا أي حساسيات.. ودور شوق غير فيا كل حاجة

كتب: ياسر خالد 

حققت النجمة مي القاضي نجاحًا لافتًا من خلال شخصية شوق، التي قدمتها ضمن أحداث مسلسل العتاولة 2 مع النجم أحمد السقا والنجم طارق لطفي، والذي عرض في ماراثون دراما رمضان الماضي ولاقى نجاحًا ملموسًا. 

في هذا الإطار، استضافت ياسمين عز مي القاضي، خلال حلقة الأمس من برنامج كلام الناس المذاع عبر قناة mbc مصر 1، للحديث عن شوق وكواليس تجسيدها للشخصية، بالإضافة إلى حديثها عن مشوارها الفني، كما أنها كشفت عن بعض الأسرار عن حياتها الشخصية.

مي القاضي عن وجود حساسيات بينها وبين هدى الإتربي: أنا من ناحيتي مافيش حاجة 

خلال الحلقة، كشفت مي عن حقيقة وجود خلاف بينها وبين النجمة هدى الإتربي، خلال تصوير العتاولة 2، حيث نفت ذلك الأمر تمامًا موضحة أنها لم تلتقِ بـ هدى خلال التصوير.

قالت مي: مافيش حساسيات بينا خالص نهائي، ماشوفتهاش ماجتمعناش في ولا مشهد خالص، مضيفة: أنا من ناحيتي مافيش أي حاجة.

عن سبب انتشار أقاويل عن وجود خلاف بينهما، أوضحت مي: ماعرفش، مشيرة: دي أول مرة أطلع أتكلم من أول رمضان، لا عملت حوار ولا طلعت تصريحات ولا عملت أي حاجة.

أردفت: فأي انطباع متاخد مش من ناحيتي أنا خالص، أنا بالنسبة لي دور مختلف عملته وخلصته وخلاص، وعما إذا كانت سعيدة بالدور، أوضحت: اتبسطت لأنه علمني إني أقدر أعمل حاجات مختلفة، أنا كنت واخدة الموضوع تحدي ودور الرقاصة دور مش سهل تمامًا. 

مي القاضي: أحمد خالد موسى عنده الجرأة إنه يغير في الممثل وعملت في شوق مجهود رهيب

أكملت: وأنا كان صعب عليا الشعبي، وماحدش كان بيرشحني في الشعبي، أستاذ أحمد خالد موسى هو اللي عنده الجرأة إنه يغير في الممثل.

لفتت مي القاضي: هتلاقي معظم الفنانين اللي معاه مش عاملين حاجة شبه الحاجة اللي بيعملوها، مردفة: فأنا كنت مبسوطة جدًا بالدور واشتغلت عليه أوي، وغيرت كمية حاجات، أنا مشيتي غيرتها، صوتي غيرته لأن طبقة صوتي كانت مشكلة لـ شوق، لأن شوق عالمة صوتها عالي وطبقة الصوت كانت أتخن.

واصلت: اتعلمت أزغرد، ضحكتي كان فيها حتة هبلة كده، كانت هتبوظلي كل اللي عملته في شوق، غيرت ضحكتي، اتعلمت الرقص، كنت فعلًا بني آدم تاني خالص.

اختتمت النجمة مي القاضي تصريحاتها: فأنا عملت في دور شوق مجهود رهيب، والحمد لله، الناس عمرها مابتتفق على حاجة، والغلطات لو كانت غلطات بنتعلم منها.