منى إش إش:«ماجد المصري تجاهلني في فرح بنتي .. واتهجمت واتقال عليا خرابة بيوت»
كتب: ياسر خالد
حلّت الفنانة منى إش إش ضيفة مع الإعلامية سهير جودة في برنامج "الستات" المذاع عبر قناة النهار، حيث كشفت عن العديد من الأسرار والتفاصيل في حياتها الفنية، إلى جانب عدد من الأسرار المتعلقة بحياتها الشخصية.
وخلال البرنامج، أعربت منى إش إش عن حزنها بسبب تجاهلها في حفل زفاف ابنتها، موضحة أن أحد المواقع أحدث نوعًا من الوقيعة بينها وبين زوجها السابق الفنان ماجد المصري، وهو ما كان بداية الأزمات بينهما.
وعلّقت منى قائلة: "كانت حصلت مشكلة اتاخدت فيها، بس أنا عرفت بعد كده إنها كانت مترتبة، فأنا استغربت، لأنك النهارده روحتي ولا جيتي أم الأولاد! أنتي الزوجة الأولى، أنتي اللي ربيتي، أنتي اللي ساندتي وساعدتي ووقفتي، وكنتي حاجات كتير أوي".
وأضافت: "فالنهاردة لما يبقى عندي الأولاد وعندي الحاجات الحلوة دي كلها، وربنا سبحانه وتعالى هو السبب فيها وبفضله، وإنك ساهمت فيها، يبقى أنتي هنا لازم تتقدّري صح".
وأوضحت منى أن زوجها السابق الفنان ماجد المصري لم يقدم الامتنان المطلوب تجاه ما قدمته لنجليهما، قائلة: "ماعملش الامتنان المطلوب، ولا عمل التقدير المطلوب، لما حصل الانفصال، أنا طول عمري حابة إن علاقتنا تفضل حلوة علشان لما ييجي يوم فرحهم ونكون موجودين مع بعض، نبقى واقفين في ضهر بعض، سند لولادنا".
وتابعت: "كنا حلوين جدًا مع بعض بس كل واحد لوحده، ده في كل الأفراح وفي كل حاجة، وده بيحزّني، لأنك بتاخدي دوري وبتديه لحد تاني مالوش صفة، يعني لا ننسى إني أم أحمد ماجد المصري وماهيتاب ماجد المصري، الأم هي الأم، خصوصًا لما تبقى أم كويسة".
منى إش إش: اتفاجئت بأحد المواقع بيهاجمني بعد حضوري فرح ابني
لفتت منى إلى أن عدم نشر صورها في فرح نجلها أحمد لم يكن ما أزعجها، موضحة: "لا، مش الصور، دي مش أول مرة، من الأول خالص".
وأضافت: "بس أنا اتفاجئت إن فيه أحد المواقع بيهاجمني وبيشتم، والغيرة ومش غيرة، وغيرة إيه؟!، جاي تتكلم بعد السنين دي كلها بغيرة إيه؟!، أنا أم العريس، إيه اللي هيخليني أغير؟ أنا في إيه ولا في إيه؟".
وتابعت منى: "لقيت إن الموقع كذا مرة ينزل حاجات، واللي ضايقني إن الطرف التاني بيشير الحاجات دي على صفحته، يعني أنت موافق إني أتهجم كده؟!".
وأردفت بتعجب: "فأنت يا ماجد، إزاي تقبل إن موقع، أيًا كان، عشان صاحبك أو صديقك، ينزل بوست زي ده، وأنت تشيره؟! كاتبين إني بغير وإني خرّابة بيوت!".
كما كشفت منى عن أسباب أخرى جعلتها تشعر بالتجاهل خلال حضورها فرح نجلها أحمد، قائلة: "لقيت صورة لابني مع حماته، وكاتبين (أحمد ووالدته)!، يعني هل أنا شفافة للدرجة دي؟!، وفي حاجات تانية، زي إنهم يذكروا كل الفنانين الموجودين، ومايذكروش اسمي، وده كان بداية التوقيع وبداية المشاكل".
واختتمت الفنانة منى إش إش تصريحاتها قائلة: "أنا من ساعة ما حصل الانفصال، وأنا كافية خيري شري وقاعدة في حالي، لا بذكر هذا ولا ذاك، وسايبة الأمور تمشي، والناس بتتكلم أو مابتتكلمش، كنت بقول ربنا سبحانه وتعالى هيجيب لي حقي لغاية عندي".
