جانجاه شقيقة سعاد حسني لـ «نبض الخبر»: الخطاب مفبرك.. و مش هنقاضي حد إحنا أكبر من كده
كتبت: نور التلباني
في أول تعليق من عائلة الفنانة الراحلة سعاد حسني على الخطاب الذي نُشر مؤخرًا ونُسب للسندريلا، ويقال إنه موجه للعندليب الأسمر عبد الحليم حافظ، نفت شقيقتها جناجـاه عبد المنعم صحة الجواب، مشيرة إلى أنه يبدو "مركّب ومُنتج"، وليس له أي أساس من الصحة.
وقالت جناجـاه في تصريح خاص لموقع "نبض الخبر":
"شوفوا الجواب عامل إزاي؟ متقطع، كل شريحة لوحدها، يعني زي ما يكونوا مركبوه. ده واضح لأي حد، حتى الطفل هيلاحظ. مفيش جواب في الدنيا يبقى كده، متقطع شرايح ويتجمع تحت بعض! ده عاملينه كأنه منتج!"
وبسؤالها عن حقيقة الخط وخلفية العلاقة بين عبد الحليم وسعاد، أضافت:
"ولا أي حاجة من دي صحيحة، وخلاص الموضوع ده انتهى. إحنا كسبنا القضية اللي رفعها علينا الأستاذ محمد شبانة بخصوص زواجهم والتشهير بالعندليب، وكسبناها. وكمان سنة 2017 الإعلامي مفيد فوزي أكد في برنامج مع وائل الإبراشي إنه كان حاضر على وثيقة الزواج، وغيرهم كتير أكدوا، فالموضوع محسوم بالنسبة لينا."
أما بشأن نشر الجواب وتوقيت ظهوره، أكدت جناجـاه أن الأسرة لن تتخذ أي إجراء قانوني، قائلة:
"لا طبعًا، إحنا أكبر من كده بكتير.. دا كلام فارغ ولا أي حاجة، بس رديت عليكم لأنكم كلمتونا كتير، والصحفيين بيتكلموا فيه، والناس بتحب عبد الحليم وبيحبوا السندريلا، فكان لازم أرد. لكن غير كده، لا رد فعل ولا اهتمام، إحنا أكبر من كده بكتير."
