ياسمين رحمي لـ نبض الخبر: «أثينا» الأفضل حتى الآن.. و«80 باكو» ينافس في الكوميديا
كتب: ياسر خالد
تعد الفنانة ياسمين رحمي من الفنانات المتميزات، اللواتي تألقن بشدة في عالم الفن، حيث قدمت أدوارًا قوية حققت من خلالها نجاحًا كبيرًا، وحصلت على إشادة الجمهور عن أدائها المميز فيها.
تواصل موقع «نبض الخبر» مع ياسمين رحمي، التي تحدثت لنا عن العديد من الأمور المتعلقة بأعمالها الفنية وأدوارها القوية والمؤثرة، التي استطاعت أن تبهر الجمهور بأدائها فيها.
ياسمين رحمي: «80 باكو قصة مختلفة والبنت الشعبية جديد على هدى المفتي وطالع حلو»
كشفت ياسمين عن الأعمال التي تتابعها خلال رمضان 2025، قائلة: «متابعة أثينا ومتابعة 80 باكو ومتابعة أشغال شقة، ودلوقتي لسه بادئة أتفرج على قلبي ومفتاحه والكابتن».
أضافت كاشفة عن أكثر الأعمال التي نالت إعجابها حتى الآن، حيث قالت: «أثينا لـ ريهام حجاج أكتر حاجة عاجباني لحد دلوقتي، وعن اللي العمل الذي استطاع أن ينافس مسلسل أثينا»، أوضحت: «اللي بينافسها بس كوميدي 80 باكو».
لفتت: «80 باكو قصته مختلفة ولذيذ، هدى المفتي عاملة حاجة جديدة عليها، البنت الشعبية جديد عليها وطالع حلو بصراحة».
ياسمين رحمي: «مش عايزة أتواجد في رمضان وخلاص وهخاف أكيد لو وقعت ضحية لبرنامج رامز جلال»
تابعت ياسمين كاشفة ما إذا كان حصولها على إجازة خلال رمضان قد أتاح لها الفرصة لمتابعة أعمال أكثر، حيث قالت: «آه طبعًا أكيد، كده كده الأعمال كتيرة فـ هتفرج وهتبسط، زي بقيت الناس ما هتتفرج وهتتبسط».
مشيرة: «مش لازم يبقى ليا مسلسل في رمضان ممكن يبقى ليا مسلسل في الأوف سيزون، ممكن يبقى ليا فيلم في السينما، زي ما هيبقى الفيلم اللي هو اللي أنا عاملاه في الصين فيلم عالمي، فمش لازم يبقى كل سنة مسلسل في رمضان، مش عايزة أتواجد وخلاص».
أضافت ياسمين كاشفة عن رد فعلها إذا ما وقعت ضحية لبرنامج المقالب الذي يقدمه رامز جلال، حيث قالت: «شيء طبيعي لو فيه مقلب هخاف أكيد، زي ما الناس كلها خافت كده بالظبط، هنفعل الانفعالات الطبيعية».
أوضحت ما إذا كانت تقلق بشأن أن يتم استضافتها في برنامج قبل رمضان، ثم تكتشف أنه برنامج رامز جلال، قائلة: «لأ، لأنه برضو رامز بينقي ناس مشهورين أكتر شوية مني، فأنا عارفة إنه لسه شوية، ممكن مش دلوقتي بعدين».
عن أنها قامت بتحضير نفسها لأنه في مرحلة ما يمكن أن يستضيفها رامز فعلًا في البرنامج، قالت ياسمين: «ممكن آه طبعًا».
بخصوص أكثر برنامج مقالب أعجبها بين برنامج رامز إيلون مصر أو برود كاست لـ حسن عسيري، أوضحت: «لسه ماتابعتش الاتنين بس هبتدي أتابعهم، لسه في بداية رمضان ففي حاجات كتير بعملها، فماتابعتش كل حاجة، فهبتدي أشوفهم».
ياسمين رحمي: «مش شايفة نفسي هعرف أعمل مشاهد الإغراء»
بشأن تصريحاتها ببرنامج تفاصيل، الذي تحدثت خلالها عن مشاهد الـlove scenes، قالت: «أنا بتقبل كل اللي بيعملوها، ماعنديش أي مشكلة معاهم خالص، بس مش شايفة نفسي لايقة على الموضوع».
أردفت ياسمين: «فيه طبعًا نوعية من المشاهد أنا مابحبهاش، الـlove scenes اللي هي الحاجات المبتذلة الأوفر، اللي هي مالهاش لازمة أساسًا، دي أساسًا مابقتنعش لا باللي بيعملها ولا بالمشاهد نفسها».
موضحة: «لكن هي كانت بتسألني مش عن المشاهد الرومانسية، عن مشاهد الإغراء، أنا قولتلها إن سعاد حسني كانت بتعمل إغراء، فاتن حمامة كانت بتعمل إغراء، شادية كانت بتعمل إغراء، وكنا بنحبه منهم جدًا، هما عارفين يعملوا ده بشكل لذيذ ومحترم ومش مبتذل، اسمه آه إغراء بس الناس كانت بتتقبله».
لافتة: «ممكن دلوقتي الناس ماتتقبلش المشاهد دي، وممكن يكون فين نوعية من الناس بتعملها بطريقة مبتذلة، تخلي المشاهد دي مش حلوة للمشاهد وهو بيتفرج عليها».
أكملت ياسمين: «أما بالنسبة لي أنا شخصيًا، أنا مش شايفة نفسي هعرف أعمل مشاهد الإغراء بمعنى الإغراء، لكن المشاهد العاطفية طبيعي أعمل مشاهد عاطفية، يعني لو بحب حد في مشهد ليه مش هعمل كده؟، أكيد هعمل كده عادي جدًا».
حول أن دور ولاء في حكليتي مع الزمان يعتبر دور إغراء، وأن ولاء لم تكن بريئة، قالت: «ماكنتش بريئة، بس مش الإغراء الأوفر، الإغراء اللي تقدر أي ممثلة تعمله».
متابعة: «مش إغراء أوفر خالص، بالعكس هي ما أغرتش حبيبها في أي حاجة، هي ممكن بتدلع على حبيبها شوية علشان تاخد منه فلوس، بتدلع على الراجل التاني علشان يحبها أكتر من مراته، بس مش إغراء».
واصلت ياسمين موضحة: «الإغراء له علاقة تانية بطريقة أكتر صعوبة يعني، لو ده الـlevel مابقدرش أسميه مشاهد إغراء».
ياسمين رحمي: «مشكلة مشاهد الإغراء مش في المخرج المشكلة إني مش هبقى حاسة نفسي حقيقية»
عمّا إذا كان وجود مخرج يستطيع أن يوظف المشهد بطريقة صحيحة في السيناريو، قد يجعلها تعيد تفكير في الأمر، أوضحت ياسمين: «هي المشكلة مش في المخرج المشكلة زي ما قولت هي فيا أنا، لو مشاهد فيها إغراء أوفر أنا مش هعرف أعملها كـ ياسمين».
مردفة: «هبقى مش صادقة هبقى مش حقيقية، مش هبقى مبسوطة من نفسي، هبقى حاسة إن أدائي مزيف وأوفر ومش مناسب، مش هبقى حاسة نفسي حقيقية»، موضحة: «مش المخرج، المخرج ممكن يوجهني، بس مش هيعرف يخليني أطلع إحساس حقيقي».
فيما يتعلق بأن أول عمل سينمائي تفتحت عيناها عليه هو النوم في العسل، الذي قام بإخراجه شريف عرفة، وأنه إذا عرض عليها مخرج كبير مثل شريف عرفة مشهدًا به قبلة، قالت: «مش هعرف أعمله مش المشكلة في المخرج، أيًا كان مين المخرج».
في حال ما إذا كان المخرج على دراية بما يفعله، أوضحت ياسمين: «هو عارف هو بيعمل إيه، أنا مش هعرف أعمل القبلة، أنا نفسي كـ ياسمين مش هعرف أعمله».
حتى في حال إذا ما حاول المخرج معها ووصل إلى صيغة معينة تريحها، كشفت: «لا لا، هي حاجات نفسية مش هعرف أعملها، مالهاش علاقة بحاول، مش هعرف أعملها».
استكملت: «فيه نوعية كده من المشاهد مش هعرف أعملها، بس ماعنديش مشكلة مع أي حد بيعملها، ومش شايفة إنها لو مش متوظفة صح مش شايفة إنها غلط».
عن ذكرها في البرنامج لفنانات عظيمات كن يقدمن هذه النوعية من المشاهد، مثل سعاد حسني، فاتن حمامة، شادية وغيرهن، أضافت ياسمين: «ونادية لطفي»، موضحة: «دي نادية لطفي كانوا بيعدوا لها القبلات في فيلم أبي فوق الشجرة، عمرنا ما قولنا عليها مش محترمة».
استدركت: «بالعكس لما توفيت نعوها وزراء ورؤساء دول، ماحدش اعتبرها حد مش كويس لمجرد إنها عملت مشاهد فيها قبلات أو مشاهد فيها إغراء».
أكدت ياسمين: «أنا ماعنديش أي مشكلة مع أي حد بيعمل المشاهد دي، بس أنا مش بعرف أعملها، مالهاش علاقة بالمخرج اللي معايا، أو الشخص اللي قدامي كممثل، مالهاش علاقة».
لكنها أوضحت: «مابعرفش أعملها، مش هعرف أعمل حاجة زي كده قدام الناس، مشهد أبوس فيه حد أو أتباس من حد، مش هعرف ببساطة».
ياسمين رحمي: «عاجباني إن أم 44 بيتكلم عن معاناة ستات من دول عربية مختلفة بشكل كوميدي ولذيذ»
تحدثت ياسمين عن مسلسل أم 44، الذي يعرض خلال رمضان، قائلة: «لسه بادئة أتفرج عليه، أول حلقة اتفرجت على نصها وماكملتهاش، هكمله لأن المسلسل عاجبني لأنه بيتكلم عن ستات ومعاناتهم وستات من دول عربية مختلفة».
مكملة: «هو مسلسل سعودي وفيه ممثلين من مصر ومن سوريا ومن لبنان ومن الكويت ومن العراق، فهو بيتكلم عن الستات في الدول العربية ومعاناتهم في حياتهم الزوجية، فالمسلسل كمان معمول بشكل كوميدي ولذيذ».
أيضًا أشارت ياسمين: «فدلوقتي متفرجة على أول حلقة، وشوفت سمية الخشاب وشوفت مشاهدها ضحكتني جدًا، وهي بتكلم جوزها وتقوله إفيهات خليجية، وتقعد تقوله يا بعد عمري وكلام كده لذيذ عجبني، فناوية أكمله».
لتوضح: «بس لسه إحنا في أول رمضان، فماقدرش أحط حكمي على الأعمال إيه الحلو وإيه الوحش، بس كله هبتدي أتابعه هبتدي آخد من كل مسلسل حلقة، واللي هيشدني هكمله».
ياسمين رحمي: «لو اتعرض عليا دور زي نبيلة عبيد في الراقصة والسياسي هيبقى أحسن دور اتعرض عليا»
أيضًا تحدثت ياسمين عن إمكانية تقديمها لدور راقصة، إذا ما عرض عليه دورًا مثل دور نبيلة عبيد في الراقصة والسياسي، قائلة: «مشايفاه إغراء أساسًا، ما دي الفكرة، أنا مش شايفة إن فيلم الراقصة والسياسي فيه إغراء خالص، بالعكس أنا شايفاه دور عادي، وطبعًا لو اتعرض عليا ده هيبقى أحسن دور اتعرض عليا».
أشارت: «ودور الرقاصة عمومًا ماعنديش مشكلة فيه، لكنها أوضحت أنها سيكون لديها تحفظات على بدلة الرقص»، قائلة: «علشان مجتمعنا طبعًا لازم هيبقى عندي تحفظات، عشان مجتمعنا يتقبلها عشان يشوفوها ومايبقوش حاسين إننا بنقدمها لمجرد الابتذال».
لتوضح ياسمين: «إحنا بنقدمها عشان أكيد فيه فكرة عايزين نقولها، مش عشان عايز نوريك جسم الرقاصة عامل إزاي، لو عايز تتفرج على رقاصة ممكن تروح نايت كلوب تتفرج عليها، لكن لو عايز تتفرج عليها في فيلم أو مسلسل يبقى إحنا بنفرجك على قصة مش البدلة وإنها تكون مفتوحة زيادة».
ياسمين رحمي: «بحترم جدًا أي ممثلة بتقدم أدوار صعبة ومختلفة عنها»
كذلك تحدثت ياسمين رحمي عمّا إذا أعجبها إش إش، الذي يعرض خلال رمضان، قائلة: «لسه ماشوفتوش، هما اللي قولتلك عليهم بس اللي أنا شوفتهم، والباقي لسه هبتدي أشوفهم، مابصتش لسه حتى عليه».
إلا أنها لفتت إلى أنه أعجبها أن مي عمر تقدم من خلاله دور راقصة، موضحة: «أنا عمومًا بحترم جدًا أي ست بتقدم أدوار صعبة ومختلفة عنها».
كاشفة عمّا إذا كانت ترى أن مهنة الراقصة مهنة صعبة، حيث قالت: «أكيد طبعًا، لأن إحنا مهنتنا مش زي مهنة الرقاصة، فقد دور بعيد عني خالص، زي إني أقدم دور رئيسة، كلما كان الدور بعيد عن الشخصية الحقيقية للفنان كلما كان صعب».
اختتمت ياسمين حديثها، قائلة: «فأنا شايفة إن دور الرقاصة من الأدوار الصعبة جدًا على الممثلات، لأنه دور محتاج إن الشخصية نفسها تبقى شخص جريء، شخص من خلفية مختلفة عن خلفية الفنانين، فيبقى بالنسبة لي ده دور صعب طبعًا».
