ماجد المصري: رجب الجريتلي تاجر مخدرات بس بني آدم
كتب: ياسر خالد
حل النجم ماجد المصري، أمس، ضيفًا مع الإعلامي عمرو أديب ببرنامج الحكاية المذاع عبر قناة mbc مصر، بعد تألقه الكبير من خلال شخصية رجب الجريتلي، التي قدمها في مسلسل إش إش مع النجمة مي عمر، والذي عرض خلال ماراثون دراما رمضان الماضي محققًا نجاحًا كبيرًا.
خلال الحلقة تحدث ماجد المصري عن بعض الجوانب الإيجابية في شخصية رجب الجريتلي، بالرغم من كونه تاجر مخدرات، واصفًا إياه بأنه "تاجر مخدرات بس بني آدم".
عن ذلك قال المصري: أنا رجب الجريتلي في حياتي ومحمد سامي رجب الجريتلي في حياته، هقولك ليه، يعني أنا مثلًا مراتي رانيا ربنا يباركلي ويحفظهالي يارب، بشكرها طبعًا على وقفتها معايا، هي نش ضاغطة عليا في شغلي، يعني هي مابتحملنيش فوق طاقتي عشان أركز وأنجح وهي ناقدة شاطرة أوي.
أضاف: لازم الراجل يدلعها ولازم فعلًا يبقى كريم معاها، يجيب دهب ويكتر من الدهب زي ما قال رجب الجريتلي في المسلسل، قالها اشتري دهب وكتري من الدهب، لأن هو عارف إن الست بتحب الدهب.
تابع: هما الستات بيحبوا الحتة، فالست لازم تتدلع بس في نفس الوقت هي كمان لازم يبقى فيه مقابل مش أخد بس، لكن ناهيك عن إن هو تاجر مخدرات لأ طبعًا هو تاجر مخدرات ده أكيد.
تحدث المصري عن مسامحة رجب الجريتلي لـ إش إش بعد معرفته بأمر حملها، موضحًا: قالها أنا هسترك عشان بحبك، الستر اللي ربنا أمرنا بيه، مع إنه تاجر مخدرات.
ليقول له عمرو أديب: تاجر مخدرات ده قاتل، ليعلق المصري: بس بني آدم، ليضيف أديب: المسدس في جنبه علطول يعني، ليرد عليه المصري: ماختلفناش بس ربنا بيقبل التوبة.
حول عدم أن رجب الجريتلي لم يتحرك قيد أنملة مع إش إش رغم معرفته بحملها، وأن الطفل هو نجل مختار، ورغم أيضًا قيامها بالإبلاغ عنه، قال: الحب ما هو محمد سامي قالك إيه انت هتحبها حبين حب الزوجة، لأنه سمع شادية وعارف إن شادية وأخوها عبد العاطي، إيهاب اللي عامل دور خطير طبعًا، وابنها شرنوبي الخطير برضو.
أردف: التلاتة دول عمالين يسرقوني بما فيهم مراتي، وسمعهم إمتى بقى هيموت، فبالتالي هو قافل من الناس دي خالص، فهو لا حول له ولا قوة، طيب لما لقى واحدة تقدر تطلع منه الحتة الحلوة اللي جواه، ومش فارقة معاها حاجة.
أكمل المصري: هقولك على حاجة لو كان عبد العاطي جابه على الأرض وقالها، هنتخيل مثلًا نهاية تانية خالص، بقولك إيه أنا جيت على الحديدة كده وعايز أتوب، معايا، معاك، لو قالها معايا يا إش إش تقوله معاك ونبتدي من جديد.
ليعلق أديب: فين الست دي، هتقوله ماعاش فلوس خلاص وإحنا ناقصينك ده كفاية بوشكاش، ليعلق المصري ضاحكًا: بوشكاش ده خطير إدوارد برضو.
ليكمل الإعلامي عمرو أديب: كله عظمة، ليعلق ماجد المصري مؤكدًا على كلامه قائلًا: كله عظمة على عظمة بصراحة، ليواصل أديب: مافيش ممثل نص نص أو ربع، ليقول المصري: لا مافيش، ليضيف أديب: كل الممثلين عظمة.
آخر أعمال ماجد المصري
يشار إلى أن آخر أعمال النجم ماجد المصري مسلسل إش إش مع النجمة مي عمر، الذي عرض خلال ماراثون دراما رمضان الماضي ولاقى نجاحًا كبيرًا.
من هم أبطال إش إش؟
شارك في بطولة إش إش كوكبة من النجوم والفنانين البارزين، من بينهم مي عمر، ماجد المصري،هالة صدقي، شيماء سيف، محمد الشرنوبي، إدوارد، انتصار، دينا، ندا موسى، طارق النهري، أحمد عبد الله، حمدي هيكل، ياسر عزت، محمد الصاوي وغيرهم.
إلى جانب عدد من النجوم الذين ظهروا كضيوف شرف، منهم عصام السقا، خالد الصاوي، محمد عبد الرحمن وكريم فهمي.
يذكر أن مسلسل إش إش قصة وإخراج محمد سامي، سيناريو وحوار محمد سامي ومهاب طارق وإنتاج حسن عسيري.
