دانا حمدان لـ«نبض الخبر»: «رجوعي من خلال صقر وكناريا هو الرجوع الصح اللي كنت أتمناه»
كتب: ياسر خالد
تشارك الفنانة دانا حمدان في فيلم صقر وكناريا مع الفنان محمد إمام، والمقرر طرحه بالسينمات خلال الفترة القادمة.
كشفت دانا حمدان في تصريحات لموقع نبض الخبر عن ملامح دورها في الفيلم، قائلة: «أنا ضيفة شرف، فوجودي ظريف خفيف صغير خالص، شخصية جيهان ده كل اللي أقدر أقوله دلوقتي».
دانا حمدان: «كان ليا نصيب إني أكون مع أستاذ عادل إمام ودلوقتي مع محمد»
حول تعاونها مع محمد إمام، بعد تعاونها مع والده الزعيم عادل إمام في مسلسل العراف، قالت دانا: «طبعًا أنا سعيدة جدًأ إني مع محمد، ودي أول حاجة جت في بالي أنا سبحان الله كان ليا نصيب إني أكون مع أستاذ عادل إمام ودلوقتي مع محمد».
كما أعربت عن سعادتها الكبيرة بالتعاون مع الفنان محمد إمام، حيث وصفته بأنه فنان ملتزم للغاية قائلة: «إنسان لذيذ جدًا، ملتزم جدًا بجد، واتبسطت أوي أوي إني اشتغلت معاه، وطبعًا نجم».
دانا حمدان: «مافيش سر لغيابي عن الدراما والسينما والحاجات دي أرزاق ونصيب»
عن سر غيابها عن الدراما والسينما، بعد نجاحها في مسلسل الطاووس، قالت دانا: «لأ مافيش سر والله، مافيش أي سر خالص خالص خالص، هو أنت عارف إن الحاجات دي أرزاق ونصيب، وكل حاجة بتيجي في وقتها مش أكتر مافيش أكتر من كده».
أردفت: «لأ طبعًا أنا عدم وجودي مالوش علاقة خالص بأي حاجة نهائيًا، مافيش أي سر ولا سبب ولا أي حاجة خالص خالص، هي أرزاق، إحنا طبيعة شغلنا في الفن فيها صعود وهبوط، شوية بيبقى وجودك قوي جدًا وشوية بيبقى فيه هدوء وترجع تتواجد بقوة وهكذا، هو ده عالم الفن».
موضحة أن هناك عوامل تحكم هذا الأمر، حيث قالت: «وده أحيانًا بيحكمه حاجات كتير، بيحكم ده وجود الدور المناسب، مثلًا الظروف العامة، بتبقى في أسباب كتيرة مش لازم يبقى فيه سبب معين خالص، بالعكس الحمد لله الحمد لله إني علاقتي بالناس كلها حلوة».
دانا حمدان: «كنت دايمًا حريصة إني أشتغل مع مخرجين كبار وربنا حقق لي ده مع حسين المنباوي»
أكملت دانا حمدان معربة عن سعادتها بالتعاون مع المخرج حسين المنباوي، حيث قالت: «ومبسوطة إني يوم ما أرجع أرجع مع مخرج قوي زي الأستاذ حسين المنباوي».
أشارت إلى أنها كانت دائمًا حريصة على التعاون مع مخرجين كبار، حيث قالت: «وده اللي كنت دايمًا حريصة عليه إني أشتغل مع مخرجين، والحمد لله إن كان ليا نصيب اشتغلت كاه مع مخرجين أقويا جدًا في أعمال حلوة مع نجوم كلهم كبار».
اختتمت الفنانة دانا حمدان تصريحاتها، حيث اعتبرت عودتها للساحة الفنية من خلال فيلم صقر وكناريا العودة الصحيحة، قائلة: «وأعتبر إن ده الرجوع الصح اللي أنا كنت أتمناه لنفسي والحمد لله إن ربنا حققه لي».
