خاص لـ«نبض الخبر» | أحمد صادق: أجسد والد مصطفى شعبان في «حكيم باشا»
كتب: ياسر خالد
يشارك الفنان القدير أحمد صادق، خلال ماراثون دراما رمضان 2025، بمسلسل «حكيم باشا» مع الفنان مصطفى شعبان.
تواصل «موقع نبض الخبر» مع أحمد صادق، الذي كشف لنا عن تفاصيل شخصية في المسلسل، الذي يُعد من الأعمال المُرتقبة خلال رمضان 2025 وينتظر الجمهور عرضه بشغف كبير.
فعن ظهوره في البرومو، قال «صادق»: «موجود في البرومو أنا وأحمد فؤاد سليم في الجامع، بس ميديم شوت مش في الكلوز شوت، نزلوا برومو تاني كنت موجود في الكلوز شوت».
أضاف: «مش واخد على خاطري، لأن أوقات البروموهات بتبقى معمولة للإعلان عن العمل، فمابتبقاش مقصودة منهم، وبعدين أنا موجود في البرومو مش مش موجود، موجود الحمد لله».
أحمد صادق: «رضوان في حكيم باشا صوت العقل والحكمة ورافض لكل ما هو غير شرعي»
تحدث عن شخصيته في «حكيم باشا»، كاشفًا: «في حكيم باشا أنا عامل في أبو مصطفى شعبان، المسلسل كله بيلعب في منطقة ورضوان الباشا بيلعب في منطقة، لأن رضوان الباشا صوت العقل وصوت الحكمة وصوت التميز، ورافض لكل ما هو غير شرعي، رافض لكل ما هو خارج على الشرعية».
مردفًا: «بيقولهم جملة جميلة جدًا: كن من تكون ولدي، النهارد دايس على التراب، بكرة تحت التراب مدفون يا ولدي، كل اللي على التراب تراب».
أوضح «صادق»: «مفتاح الشخصية رغيف العيش ودكر البط بيشبع، تأكلها بالحلال، دي الشخصية وفيه تجارة آثار مصطفى شعبان وأحمد فؤاد سليم، وأتمنى إن ربنا يوفّقنا».
أحمد صادق: «عملت فن جيد في مجموعة أعمال متميزة»
كما كشف عن مشاركته في مسلسل «ألف ليلة وليلة - جودر 2» مع الفنان ياسر جلال، قائلًا: «أظهر كضيف شرف في جودر 2، عامل الملك المذهّب».
بشأن أكثر الأعمال التي يعتز بها خلال مسيرته الفنية، قال: «سوق العصر، الرقص على سلالم متحركة، الناس في كفر عسكر، عملت مجموعة أعمال كانت متميزة، ماتقدرش تقول فين أفضل، مافيش أفعل التفضيل، فيه مجمل الأعمال إنك عملت فن جيد ماتخجلش منه».
مضيفًا: «آخر حاجة كنت أنا عاملها المعلم السنة اللي فاتت، وضرب نار اللي قبلها، واللي مالوش كبير اللي قبلها، تفاحة آدم، أعمال تقول أنا عملت تمثيل جيد وفن جيد في أعمال جيدة».
أحمد صادق: «سوق العصر والناس في كفر عسكر يعيشوا 100 سنة»
أيضًا تحدث «صادق» عن نجاح سوق العصر الكبير رغم عرضه خارج رمضان، قائلًا: «ده مازال بيحقق، لحد دلوقتي بيجيلي تليفونات وناس بيقابلوني، حد إمبارح قالي ده بيتعرض يا أستاذ أحمد، الوقت اللي إحنا فيه دلوقتي بيتعرض، وشباب عندهم 20 سنة ماكنوش اتولدوا وقت المسلسل».
أشار: «فيه مسلسلين أنا عملتهم يعيشوا 100 سنة، سوق العصر والناس في كفر عسكر، الناس في كفر عسكر الله يرحمه بشير الديك، إحنا عملناه 2003، أنا شخصيًا بشوف لحد من شوية التيك توك بينزل عليه مقاطع، أنت كم المشاهد على الناس في كفر عسكر غير عادي، خصوصًا إنه طارح فكرة الأصل والوارد».
موضحًا: «أصل المكان واللي جاي عليه، واللي كان جاي جعان ومش لاقي ياكل ده، مع الوقت زق صاحب المكان وخد مكانه وصاحب المكان بقى مشرّد».
أحمد صادق: «جودر فيه مصداقية والمعلم قريب من الناس»
عمّا إذا كان الجمهور يفتقد لهذه النوعية من الأعمال، قال صادق: «جدًا، الشعب المصري عنده حاسّة تذوّق غير عادية، بدليل إن جودر السنة اللي فاتت نجح، وهو مسلسل بتتكلم في الخيال والتخيّل، مش بنتكلم في الواقعية».
تابع: «ألف ليلة وليلة خيال وتخيّل مش واقعي، ومع ذلك نجح لأن فيه مصداقية شديدة جدًا، ومخرج طبعًا متميز جدًا أستاذ إسلام خيري وأستاذ أنور عبد المغيث، المعلم نجح لأنه قريب من الناس أنت لمست الناس».
أحمد صادق: «المغازية في سوق العصر المقصود بيهم المصريين»
لفت أحمد صادق: «الشعب المصري بيعشق الحدوتة، نجاح سوق العصر في العيلة المغازية، أصل هما المغازية في المسلسل المقصود بيهم المصريين».
اختتم الفنان القدير أحمد صادق حديثه، قائلًا: «أنت شايف نماذج، الواد الطيب الغلبان، الطموح، الـnerve خالص، اللي أبوه وعصب العيلة، الأب العظيم والأخ اللي مش فاهم، التركيبة، علاقتهم بالحياة وعلاقتهم بالسلطة ما قبل ثورة 23 يوليو».
