خاص لـ «نبض الخبر»: هيدي كرم تكشف حقيقة التصريح المنسوب إليها حول ملامح البنت الصعيدية
كتب: ياسر خالد
انتشر خلال الساعات الماضية تصريح منسوب للفنانة هيدي كرم تتحدث خلاله عن صعوبة تجسيدها لأدوار الفتاة الصعيدية مُرجعة السبب في ذلك إلى ملامحها، وتصف خلاله ملامح البنت الصعيدية بأنها "مش أحسن حاجة"، ليلقى هذا التصريح رواجًا واسعًا، تصدرت هيدي على إثره التريند.
قد تواصل موقع «نبض الخبر» مع هيدي كرم التي كشفت لنا حقيقة كشفت لنا حقيقة هذا التصريح، حيث أوضحت أن التصريح تم اختلاقه وأنها لم تقُل هذا التصريح، وهو تصريح عارٍ من الصحة ومغلوط تمامًا.
قالت هيدي: «التصريح أنا ماقُلتوش، متفبرك، مش صحيح، موضحة هي سألتني أنتي ملامحك بتحدك في أدوار معينة عشان أنتي ملامحك يعني مش مصرية وأجنبية وماينفعش تعملي أدوار كتير زي البنت الصعيدية؟، قُلتلها آه طبعًا، لأني شكلي، ألواني، لون بشرتي وون عينيا ولون شعري، وحتى ملامحي وشكل وشي مايشبهش البنت الصعيدية».
هيدي كرم: «أخاف أعمل دور البنت الصعيدية لأني ممكن ماقنعش الناس»
أشارت: «البنت الصعيدية قمحية، عينيها عسلية وشعرها غامق، وأنا ألواني مختلفة، فـ للأسف إن الاختلاف ده هيأثر عليا أنا سلبي وحرمني من إني أعمل أدوار كتير منها بنت البلد، منها البنت الصعيدية، منها البنت الفلاحة، لأننا مش شبه بعض أنا مش هبقى مقنعة، لافتة: «وأنا لو جالي دور زي ده أخاف أعمله، لأني ممكن ماقنعش الناس».
أضافت هيدي: «يعني أنا ممكن أتحايل على شكلي لحدود معينة، يعني عينيا ألبس لينسز ماشي، أغمّق سِنّة بشرتي، لكن فيه حاجات في ملامحي مش هتبقى شبه البنت الصعيدية».
تابعت: «وبعدين ما هو الممثلات المصريين اللي ينفع يلعبوا دور البنت الصعيدية كتير، وهيكونوا مقنعين أكتر مني، فـ بالتالي أنا للأسف مش هعرف أعمل النوعية دي من الأدوار».
هيدي كرم عن تصريحها عن ملامح الفتاة الصعيدية: «عمري ما قُلت التصريح المغلوط تمامًا ده»
لفتت: «لكن عمري ما قُلت التصريح المغلوط تمامًا ده بتاع إن البنت الصعيدية ملامحها مش أحلى حاجة، لأن ده كلام مش حقيقي، لأن البنت الصعيدية زي القمر وفيه بنات صعايدة زي القمر وجمال جدًا وملامحمهم رائعة، وغنولهم مطربين كتير لجمال بشرتهم وعينيهم العسلية وشعرهم الأسود».
أردفت هيدي: «فده تصريح ساذج واللي يصدق إني قُلت كده يبقى شخص ساذج، مُوضحة: وبعدين هي دي ملامح البني آدم، يعني ماقدرش أجيب أحمد زكي، وأقوله يا أحمد يا زكي أنا عايزك تعمل دور ممثل طلياني، دور شاب فرنساوي، أو أجيب مثلًا ممثل أفريقي وأقوله أنا عايزك تعمل دور شخص نمساوي».
هيدي كرم: «الجمهور ممكن مايقتنعش بيا في دور الصعيدية لأن ملامحي مش مساعداني»
أكملت: «يعني طبيعي إنه الملامح لا دي وحشة ولا دي وحشة ولا دي حلوة ولا دي أحلى منها، أنا لو اتعرض عليا دور الصعيدية ده، أنا هتتردد جامد جدًا قبلما أعمله، لأني أخاف الجمهور مايقتنعش بيا مهما كنت ممثلة شاطرة لأن ملامحي مش مساعداني».
مُشيرة: «وده إن أثر على حد سلبًا فهو أثر عليا أنا، لأنه يمكن أنا لو كانت ملامحي مصرية أكتر، كنت قدرت أعمل مجموعة أكبر بكتير من الأدوار».
اختتمت هيدي كرم حديثها قائلة: «فطبعًا ده تصريح ساذج، واللي كتبته أو اللي كتبه حد ساذج جدًا»، لافتة: «وأنا ماعرفش هو نزل على موقع رسمي ولا لأ؟، ولا هو منتشر على السوشيال ميديا؟، يعني هل فيه موقع رسمي محترم منزل الخبر ده؟، ولا هو متنقل على صفحات صحافة صفرا على السوشيال ميديا؟، أنا ماعرفش».
آخر أعمال هيدي كرم
يذكر أن آخر أعمال الفنانة هيدي كرم مسرحية «الباشا» مع الفنان كريم عبد العزيز والفنانة هنا الزاهد، التي تم عرضها ضمن فعاليات موسم الرياض الخامس وشهدت إقبالًا جماهيريًا واسعًا، وكذلك مسلسل «وتر حساس» مع الفنانة صبا مُبارك والفنانة إنجي المقدم، الذي تم عرضه في نهاية العام الماضي وحقق نجاحًا كبيرًا.
