تيسير عبد العزيز لـ نبض الخبر :حنان مطاوع موهبة مافيش شبهها وإنسانة مافيش منها
كتب: ياسر خالد
تستعد الفنانة تيسير عبد العزيز غدًا لانطلاق عرض أحدث أعمالها الدرامية مسلسل "صفحة بيضا"، الذي تشارك في بطولته مع النجمة حنان مطاوع وتلعب خلاله شخصية شيرين.
تواصل موقع "نبض الخبر" مع تيسير عبد العزيز، التي كشفت لنا عن ملامح شخصية شيرين، كما تحدث عن مشاركتها في مسلسل "مُشتهى" مع النجمة درة والمُنتظر أن يُعرض خلال السباق الرمضاني القادم.
تيسير عبد العزيز: "شيرين شبه ستات وبنات كتير في المجتمع في الوقت الحالي"
بشأن شخصية شيرين في "صفحة بيضا" قالت تيسير: "الشخصية بتاعت شيرين شبه ستات وبنات كتير في المجتمع في الوقت الحالي، فهي اللي بتمناه إن نسبة ما من الستات والبنات يشوفوا نفسهم فيها".
عما إذا كانت الكيميا بينها وبين حنان مطاوع قد زادت بعد تعاونهما للمرة الثانية في "صفحة بيضا"، بعدما تعاونتا من قبل في مسلسل "وعود سخية"، أوضحت تيسير: "طبعًا"، مشيرة: "وهي عالية من يوم وعود سخية".
تيسير عبد العزيز: "بحب حنان مطاوع جدًا وأنا أصلًا من جمهورها"
لفتت: "وعلى فكرة إحنا زمان مع بعض، بس ماكنش لينا شغل مباشر، إحنا كنا في مسلسل الست أصيلة زمان مع بعض، بس ماكنش لينا مشاهد مباشرة مع بعض".
كذلك تحدث تيسير عن النجمة حنان مطاوع على المستويين الفني والإنساني قائلة: "أنا طول عمري بحبها جدًا وشايفاها من أهم الممثلات في مصر، وهي موهبة مافيش شبهها وإنسانة في منتهى الأدب والأخلاق والإنسانية".
تابعت: "حنان دي مافيش منها اتنين، أنا أصلًا كده كده من جمهورها وبحبها جدًا، جميلة جدًا ما شاء الله عليها".
تيسير عبد العزيز: "بلعب شخصية ندى صاحبة درة في مُشتهى"
عن مشاركتها بمسلسل "مُشتهى" مع درة، قالت: "مُشتهى اسم البطلة اللي هي درة، أنا بلعب شخصية ندى صاحبتها"، وأوضحت ما إذا كانت شخصيتها في العمل صعيدية، قائلة: "أنا مش صعيدية ولكن هي المفروض بنت من أصول صعيدية".
تطرقت تيسير بالحديث عن تعاونها مع النجمة درة للمرة الثانية بعد حكاية "حبيبة أمها" بمسلسل "نصيبي وقسمتك 2"، قائلة: "أنا بحب الحكاية دي جدًا وحبيت درة جدًا على المستوى الإنساني في الحكاية دي وكنت حاسّة بجد إننا إخوات".
تيسير عبد العزيز: "أنا ودرة انبسطنا جدًا إننا اتجمعنا تاني في مُشتهى"
أردفت: "ولما رجعنا نشتغل مع بعض انبسطنا جدًا إننا اتجمعنا تاني كانت حاجة لذيذة، وبدأنا فعلًا التصوير وربنا يكمله على خير إن شاء الله".
حول عودتها للدراما الرمضانية بعد غيابها عن رمضان الماضي، أوضحت: "بعد وعود سخية وضرب نار ماكنتش في رمضان اللي فات، فطبعًا كان نفسي يبقى عندي حاجة تاني في رمضان فجه مُشتهى".
أشارت تيسير: :والحمد لله صفحة بيضا هيخلص قبل رمضان مباشرة هيخلص عرض قبل رمضان بالظبط"، وأوضحت أن كلا المسلسلين مكونان من 30 حلقة، قائلة: "صفحة بيضا 30 حلقة ومُشتهى 30".
تيسير عبد العزيز: "بحب الحلقات الصغيرة اللي بتكون أحداثها مكثفة"
من حيث ما إذا كانت تفضل الأعمال الطويلة المكونة من 30 حلقة أو أكثر أم الأعمال القصيرة المكونة من 10 أو خمس حلقات، قالت تيسير: "الخمس حلقات زي نصيبي وقسمتك أو العشرة، بحب الحلقات الصغيرة اللي بتكون أحداثها مكثفة".
فيما يتعلق بما إذا كانت تقلق بشأن المط والتطويل الذي يمكن أن يصاحب الـ30 حلقة، أوضحت: "لأ، هتلاقي مثلًا صفحة بيضا هو مُحتمل الـ30، لأن الناس إن شاء الله هيلاقوا إن الأحداث إيقاعها مستمر".
أضافت تيسير: "ومافيش هيبقى في الهدوء اللي في النص بيحصل، هو يستدعي إنه يبقى 30"، لافتة: "فيه حاجات هي لازم تبقى 30، لكن أنا مايلة أكتر للمسلسلات القصيرة".
تيسير عبد العزيز: "عمر ما حاجة هتسحب الجو من التليفزيون"
بخصوص خوضها تجربة عرض مسلسل لها عبر منصة إلكترونية، قالت: "لأ لأ، ولا مرة لسه، يعني أتمنى يارب، نفسي التجربة دي جدًا، الـ8 حلقات والـ10 حلقات الحاجات دي".
كشفت تيسير عن رأيها حول ما إذا كان يمكن أن تسحب المنصات الأجواء من التليفزيون، قائلة: "عمر ما حاجة هتسحب الجو من التليفزيون".
تيسير عبد العزيز: "وجود كذا منصة بيعمل منافسة"
مشيرة: "إحنا القطاع الكبير من الجمهور لسه مُعتمد على المشاهدة العادية، اللي هي القنوات اللي بيتفرجوا عليها على التليفزيون، خلينا نقول إن ده النسبة الكبيرة من الجمهور".
أكملت تيسير: "لكن المنصات وجودها مهم، أولًا وجود كذا منصة التنوع في المنصات ده بيعمل منافسة، المنافسة يعني كل واحد عايز يقدم جودة أحسن وأعمال أفضل، فده في مصلحة الدراما إنه بيخدم الفكرة، كل واحد عايز يعمل أحسن ما عنده".
مردفة: "زائد إنها مناسبة جدًا لناس كتير، فيه ناس بتبقى شغالة مثلًا طول الأسبوع، بتحب إنه في أجازة الأسبوع تفتح مسلسل تتفرج على الحلقات اللي فاتتها في أي وقت تلاقيها موجودة".
واصلت تيسير: "ممكن حد قاعد في عيادة دكتور قاعد مستني ميعاد الكشف بتاعه، فبيفتح على الموبايل يشوف الحلقة، في المواصلات الناس وهما في الطريق ممكن يتفرجوا، بتعمل مشاهدة اللي هو الحاجة هتتشاف يعني هتتشاف".
تيسير عبد العزيز: "المنصات تطور لابد منه"
متابعة: "فكرة إنه موجود على التليفون في إيدك، على الشاشة في بيتك، يعني المنصات موجودة معاك، أنت مش مُلزم بميعاد عرض القناة، لو فاتك يبقى خلاص الحلقة فاتتك".
استكملت تيسير: "أنت الحلقة معاك وقت ما أنت عايز، مسلسل كامل لو فاته هيفتحه في أي وقت، يقول والله أنا الأيام دي بتفرج على مسلسل كذا، اللي هو مثلًا ماكنش شافه كل الناس شافوه".
لافتة أن المنصات تطور لابد منه، حيث قالت: "فهي فكرة لذيذة جدًا موضوع المنصات، وده تطور لابد منه، هو العالم كله خلاص بقى كده".
مضيفة: "فيه ناس بتفضل إنها تتفرج من غير إعلان علطول ورا بعضه، والحلقات كلها مثلًا متجمعة ورا بعض، أو لما تنزل الحلقة بيستناها، يعني أيًا ما كانت الطريقة بس فيه ناس بيفضلوا كده".
تيسير عبد العزيز: "بفضل أتفرج على التليفزيون لأنه بيحسسني بزمان"
أما عما إذا كانت تفضل مشاهدة على شاشة التليفزيون أم عبر المنصات، أوضحت تيسير: "في رمضان في العزومات بحس إن القنوات ليها زهوة بتحسسني برمضان زمان".
أيضًا أشارت: "حتى لو الإعلانات طويلة معلش ما إحنا بنتكلم، بنحلي، بنصلي، بنعمل أي حاجة على بال ما الإعلانات تخلص، ففي رمضان بيبقى ليها زهوة بصراحة وبتفكرك بزمان".
لتوضح تيسير عبد العزيز أن رمضان يكون موسم إعلانات، قائلة: "بيبقى موسم إعلانات كمان، بتبقى إعلانات لذيذة بنحفظها على آخر رمضان، بيبقى موسم لذيذ".
تيسير عبد العزيز: "في الأيام العادية بفضل المنصات"
أكدت أنها في الأيام العادية لا تتحمل الإعلانات، مُفضلة مشاهدة الأعمال عبر المنصات، قائلة: "لكن في الأيام العادية مابستحملش مابقدرش، مش هينفع الواحد يقعد يضيع وقت".
متمة: "ولو حاجة كمان فيها ساسبنس وأحداث وعندي فضول وعايزة أكمل، بدوس الحلقة التالية بجيب الحلقة اللي وراها وأنا قاعدة مكاني، فأنا بالنسبة لي في الأيام العادية المنصات طبعًا".
