أحمد خالد أمين لـ«نبض الخبر»: مصطفى شعبان وجه مصري أصيل.. وسهر الصايغ من مدرسة سناء جميل
كتب: ياسر خالد
يخوض المخرج أحمد خالد أمين ماراثون دراما رمضان 2025 بمسلسل حكيم باشا، الذي يقوم ببطولته النجم مصطفى شعبان، وقد لاقى العمل نجاحًا كبيرًا منذ بداية عرضه وحتى الآن.
تواصل موقع نبض الخبر مع أحمد خالد أمين، الذي كشف لنا عن كواليس حكيم باشا، كما أعرب عن سعادته بالتعاون مع مجموعة من الفنانين المتميزين من خلال المسلسل.
أحمد خالد أمين: حصل بيني وبين مصطفى شعبان تفاهم إنساني وعملي من أول بروفا
فعن كيفية اختياره لـ مصطفى شعبان في دور صعيدي، رغم أنه لم يسبق أن قدم مثل هذا الدور من قبل، قال أمين: اللي بيخافوا منهم يعملوا صعيدي، هما أحسن ناس يعملوا صعيدي.
أضاف: أولًا مصطفى شعبان بعيدًا عن إنه نجم كبير وممثل كبير وشاطر وكل حاجة، الملامح بتاعته الخمرية بتاعت لون بشرته وعينيه السمرا وشكله، يخليك تصدق كده إنه صعيدي.
أردف: لأن مصطفى شعبان كمان الملامح بتاعت وشه الملامح المصرية أوي، فيقدر يعمل صعيدي يقدر يعمل فلاح يقدر يعمل باشا، وشه تصدقه في أي دور.
حول وجود كيميا بينه وبين النجم مصطفى شعبان، على الرغم من أنها المرة الأولى التي يتتعاونان فيها، أوضح أمين: هي من أول بروفا قعدنا فيها على الورق وقعدنا نتكلم فيها عن المسلسل، حصل بينا تفاهم إنساني وعملي على المستوى الفني والمستوى الشخصي، خلى بينا كيميا طول الوقت إننا دماغنا متفقة.
مشيرًا: هو نجم دؤوب جدًا، لما بيلاقي المخرج اللي معاه بيحضر طول الوقت وعنده رؤية طول الوقت جميلة للمشاهد وللشخصيات، هو بيسيب إيده خالص.
أحمد خالد أمين: حسيت إن ورق محمد الشواف فيه نفس ريحة محمد صفاء عامر
كما تحدث أمين عن تعاونه مع المؤلف محمد الشواف مشيدًا بالسيناريو الخاص به، حيث قال: عايز أقولك على حاجة والله مش مبالغة، أنا آخر مخرج اشتغلت على ورق الراحل محمد صفاء عامر في مسلسل أفراح إبليس، حسيت الورق المرة دي فيه نفس الريحة.
أكمل: ونفس القوة بتاعت الأحداث والشخصيات واحترام عقلية اللي بيفترج كمان جدًا، خصوصًا إن ليا تجربة مع شواف بحبها جدًا أكتر مسلسل بحبه كنت عامله برضو مع شواف اللي هما الـ5 حلقات بتوع أحمد خليل ويوسف عثمان اللي كانوا في ورا كل باب.
تابع أمين: وخدنا برضو عليها إثناءات كتير جدًا من حتى النقاد ومن كل الناس، فشواف بتجمعني بيه كيميا الورق وورقه نفسه بيبقى غني.
لافتًا: مؤلف من العصر بتاع أسامة أنور عكاشة ومحمد صفاء عامر من نوعية المؤلفين اللي هما عمالقة الدراما واللي عملوا تاريخ الدراما، وأنا أتوقع له إنه هيبقى من المؤلفين اللي هيبقى ليهم تاريخ قدام كبير جدًا.
أحمد خالد أمين: فيه أعمال 15 و10 بيبقى إيقاعها أسوأ من الـ30
عمّا إذا كانت أعمال الـ5، الـ10 والـ15 حلقة أصعب أم أعمال الـ30 والـ60 حلقة، خاصة أنه قدم جميع الأنواع، قال: هو كله صعب، كل نوع حسب المشروع أنت عايز تطلع منه إيه بالظبط.
واصل: يعني مثلًا إنترفيو موضوع مودرن جدًا بتاع الوقت الحالي بتاع الشباب وفكرة الأبلكيشنز والمواقع اللي بتوفق الولاد والبنات مع بعض.
أوضح أمين: مش فكرة 10 ولا 30 فكرة إنك عايز تقدم حاجة معينة بشكل معين، والأحداث شافاك بطريقة معينة عايز تقدمها للناس زي ما هي شاداك، فهي دي الصعوبة سواء 10 ولا 30 إن يبقى إيقاعك دايمًا سريع.
لفت: خلي بالك بيبقى فيه أعمال 15 و10 بيبقى إيقاعها أسوأ من الـ30، لأنهم بيعملوا أول حلقتين إيقاعهم مشدود ويفضلوا يملوا في بقيت الحلقات، وييجوا في آخر حلقتين يجمعوا المسلسل، طيب ما كان اتعمل في 5 حلقات من الأول.
أحمد خالد أمين: جملة طيبة قلبي اللي مشندلة حيلي مكتوبة في الورق
أمّا عن جملة "طببة قلبي اللي مشندلة حيلة"، التي جاءت على لسان النجمة سهر الصايغ خلال المسلسل، كشف أنها كانت مكتوبة في السيناريو، قائلًا: دي مكتوبة في الورق، كل حاجة مكتوبة متقالة في الورق، أصل خلي بالك هنا عشان موضوع اللهجة كان مصعب جدًا على أي ممثل إنه يطلع بحاجة من عنده.
موضحًا أنه لا يمانع في أن يرتجل أحد الفنانين، طالما رأى أن الجملة جيدة، قائلًا: لأ خالص، وفيه حاجات بتطلع في أوقات بتبقى حلوة جدًا.
أشار: بس إحنا المسلسل المرة دي عشان فكرة اللهجة فالممثل لو جه في باله حتى إفيه أو جه في باله جملة حتى تبان إنها حلوة، يخاف يقولها تبقى صيغتها الصعيدي مش حلوة، فيبوظ مجهود الصفحة الكاملة اللي قايلها.
استكمل أمين: فدي بيبقى فيها عناية جدًا سواء في الصعيدي أو التاريخي، أنت بتكسرلي كلام لغة عربية أو بتتكلم لهجة صعيدي.
مضيفًا: حتى لعلمك الممثلين الصعايدة، عشان الفكرة إن الصعيد ليه كذا لهجة، فأنت مختار أنهي لهجة هنا، فحتى لو جه يخرج عن النص بطريقته، ممكن يخرج بلهجة من المنيا لهجة سوهاجي، ماتبقاش اللي أنت عاملها للمسلسل.
بالإضافة إلى ذلك قال أمين: فده كان بيلعب عليه فكرة الخروج، وكنا حتى بنقعد وإحنا بنقرأ المشهد لو فيه حد عنده اقتراحات أو حاجة، وإحنا بنقرأ نفكر فيها علشان مصحح اللهجة يقولنا تتقال إزاي.
ليوضح: أنا ساعات كنت بطلع بجمل معينة نفسي تتقال، كنت بجيب مصحح اللهجة أقوله دي بالصعيدي تتقال إزاي.
أحمد خالد أمين: سهر الصايغ ممثلة من العيار التقيل أوي ومن مدرسة سناء جميل
تطرق أمين بالحديث عن قدرة سهر الصايغ على تقديم الشر بخفة ظل في المسلسل، قائلًا: هي سهر ممثلة عندها ميكس غريب جدًا، إنها بتمتلك مجموعة من الأدوات مش موجودة في ممثلة من الممثلات الموجودين حاليًا، فكرة خفة الدم مع التمثيل التقيل دي صعب تلاقيها حاليًا في الجيل ده.
مسترسلًا: موجودة في الجيل اللي قبله ممكن في منى زكي طبعًا، في ياسمين عبد العزيز، منة شلبي، بس الجيل الحالي الموجود دلوقتي، اللي بتكلم فيه اللي هو جيل البنات الجداد أو اللي هما البطلات الجداد.
أشاد بـ سهر الصايغ قائلًا: سهر بتملك الحسنيين، فكرة خفة الدم وفكرة إنها ممثلة من العيار التقيل أوي مدرسة سناء جميل، اللي هي ممكن تعملك دور تخليك تعيط وممكن تعملك دور واحدة طيبة جدًا تبقى بتشفق عليها، فهي بتقدر تتلون بصراحة في أي دور لإنها شاطرة حقيقي.
إلى جانب ذلك أوضح المخرج أحمد خالد أمين: هي حتى في الكواليس والكاميرا مقفولة هي جوه الشخصية مابتفصلش، يعني لو قعدت تصور معاك 24 ساعة، هي الـ24 ساعة هي برنسة، هي مركزة في الشخصية تمامًا.
مواصلًا: هي دماغها في حتة تانية إنها جوه برنسة، مش مركزة مين حواليها بيتكلم في إيه التصوير، عاملة زي الجيل بتاع عبد الله غيث، الجيل اللي كان بيقدس أوي الأدوار وفكرة الدمج في الشخصية، وإنه يبقى مخلي كل وقته للدور اللي بيعمله.
متابعًا: فـ سهر حقيقي من النوعية دي، ورياض الخولي طبعًا أستاذ عظيم، وأحمد فؤاد سليم، أنا بصراحة معايا مجموعة من أحسن وأعظم الممثلين االي اشتغلت معاهم فعلًا أو إن أي مخرج يبقى محظوظ إنه اشتغل معاهم.
أحمد خالد أمين: بعد العيد هعلن عن حاجة جديدة إن شاء الله
اختتم المخرج أحمد خالد أمين حديثه كاشفًا عن أعماله الجديدة، حيث قال: هو أنا أجازة بس لغاية بعد العيد، وبعد العيد هعلن عن حاجة إن شاء الله هتبقى قريب بعد العيد بإذن الله.
