هنا الزاهد: عمري ما كنت أتخيل الطلاق.. ووالدي مجرد صوت بيطمن عليا من وقت للتاني

كتبت: نور التلباني 

كشفت الفنانة هنا الزاهد عن مشاعرها بعد انفصالها عن الفنان أحمد فهمي، مؤكدة أنها تجاوزت تلك الفترة الصعبة بعد عام ونصف من الألم، لكنها لا تزال تفتقد شعور الحب الحقيقي في حياتها.

وقالت هنا خلال لقائها في برنامج AB Talks: "عدّت سنة ونص كنت مش كويسة خالص، بس دلوقتي بقيت أحسن وبدأت أركز على نفسي وعلى أهلي، مبسوطة، بس الحب ناقصني، ومحستش طول حياتي إني عشت قصة حب صحية".

وأضافت: "اتخضيت لما حصل الطلاق، عمري ما تخيلت إني همر بالتجربة دي، وكنت دايمًا بستغرب لما واحدة تقول أنا اتطلقت، بس للأسف التجربة دي حصلتلي".

أما عن علاقتها بوالدها، فقالت: "أنا عشت طفولة مش مستقرة بعد انفصال بابا وماما، وكنت صغيرة جدًا، علاقتي بوالدي محدودة، بيكلمني من وقت للتاني، لكن عمره ما كان زي الأب اللي أقدر أطلب منه حاجة.. كنت بتكسف منه جدًا، وبقول كتر خيره إنه بيدفع مصاريف المدرسة".

أعمالها القادمة

من ناحية فنية، تستعد هنا الزاهد لعرض فيلم "ريستارت"، الذي تشارك في بطولته مع النجم تامر حسني، إلى جانب باسم سمرة ومحمد ثروت ونخبة من النجوم.