محمد رمضان: لا عمري لبست حلق ولا حمالة صدر.. أنا بفكها يا ليفة!
كتبت: نور التلباني
خرج الفنان محمد رمضان عن صمته ورد على الانتقادات اللي طالته بعد ظهوره بلبس غير معتاد خلال حفله في مهرجان كوتشيلا الشهير بكاليفورنيا.
رمضان قال في فيديو نشره على إنستجرام إنه ما كانش مهتم يرد في الأول عشان كان بيركز على حفله التاني اللي بيعتبره تكريم لاسمه واسم بلده، وأضاف:
"الناس اللي متابعاني من زمان عارفين أنا مين، وعمري ما مثلت دور ست، ولا لبست لبسها، سواء في أفلام أو مسلسلات، مع احترامي التام للفنانين اللي قدموا أدوار مختلفة".
أما عن الجدل اللي حصل بسبب لبسه في الحفل، أوضح رمضان: "أنا لبست حلق قبل كده في كليب وفيلم، لكن ده كان تمثيل، في الحقيقة عمري ما لبست حلق ولا ناوي ألبس ولا عمري لبست حمالة صدر لكن بعرف أفكها يا ليفه وجمهوري عارفني كويس".
وأكد إن اللوك اللي ظهر بيه ما كانش مقصود يفهم بالشكل السلبي اللي انتشر على السوشيال ميديا، وقال: "الستايل كان فرعوني، لكن للأسف التصميم طلع أقصر من المتوقع، لأن المصممة فريدة مكانتش معايا بميزانية تسمح، بس النية كانت حلوة".
