سماح محمد: زوجي أصيب بجلطة بعد منعي من دخول نادي الزمالك وحجز بضاعتي.. واستغيث بالدولة للحصول على حقي

كتب: وليد الششتاوي محمد

قدمت السيدة سماح محمد، صاحبة فيديو الاستغاثة من داخل نادي الزمالك، تفاصيل الأزمة التي تمر بها منذ فترة داخل النادي، مؤكدة تعرضها للظلم والإهانة وتهديد مصدر رزقها.

وقالت سماح: "زوجي بقاله 50 سنة متواجد في نادي الزمالك، وأنا بقالي 25 سنة. إحنا مأجرين مكان صغير حوالي 7 أمتار داخل النادي، وبنبيع فيه حلويات ولعب أطفال، والمكان ده هو مصدر رزقنا وبيفتح بيوت ناس غيرنا كمان".

وتابعت: "عقد الإيجار كان بيتجدد كل 3 سنين، والناس كلها بتشهد لنا بالأخلاق والسمعة الطيبة. لكن مؤخرًا، مدير الأمن ومدير العلاقات العامة في النادي بدأوا يسلطوا علينا العمال والعاملات، واتعرضت للإهانة وتشويه سمعتي وشتائم وتجاوزات كثيرة".

وأضافت: "وصل الأمر إنهم خلوهم يرفعوا مذكرات كيدية ضدي للإدارة، قالوا فيها إني شتمت عاملة، وفرضوا عليا غرامة 10 آلاف جنيه. وبدأوا يضايقوني بكل الطرق، تطفيش وتنمر رهيب، وخوض في عرضي بدون وجه حق".

وأردفت: "لما جه ميعاد تجديد عقد الإيجار، رفضوا يجددولي، ورفضوا يدوني التأمين بتاعي، وقالولي إن عليا 35 ألف جنيه لشركة الكهرباء، بسبب سرقة كهرباء، وده والله ما حصل أبدًا".

واستكملت: "مش بس خدوا مني فلوس التأمين، كمان منعوني من دخول النادي، وقافلين على بضاعتي وشغلي، ورافضين يدخلوني عشان آخد حاجتي".

وكشفت عن تدهور حالة زوجها الصحية: "بعد اللي حصل، زوجي ما استحملش، وجاله جلطة في القلب، وتم حجزه في المركز الطبي بالحوامدية".

واختتمت حديثها: "حسبي الله ونعم الوكيل في كل اللي ظلمني. أنا بستغيث بالدولة، مش عايزة غير حقي".