لبنى ونس: تعرضت للتحرش من صديق والدي وأنا طفلة.. وندمت على التمثيل

كتبت: نور التلباني 

كشفت الفنانة لبنى ونس عن واحدة من أكثر لحظات حياتها وجعًا، خلال ظهورها مع الإعلامية يمنى بدراوي في برنامج ورقة بيضا على قناة النهار، حيث فتحت قلبها للحديث عن ماضيها، مشوارها الفني، وعلاقتها بأولادها وأحفادها.

لبنى بدأت كلامها بإحساس فخر بنجاحها في موسم دراما رمضان 2024، خاصة مشاركتها في مسلسل شباب امرأة مع نجلها الفنان يوسف ونس. قالت: "كنت بذاكر مع يوسف كل يوم، وقدرنا نفصل بين الحقيقة والمشهد، وبالنسبة لي اللوكيشن مقدس ومينفعش أخرج من شخصية بعملها بسهولة".

لكن اللحظة الأكثر ألمًا كانت لما حكت عن الموقف اللي أثّر في طفولتها ونظرتها للناس، وقالت: "اتحرشت بيه صاحب بابا.. كنت صغيرة وكان بيحضني ويطبطب عليا، بس لما كبرت فهمت، ومن وقتها وأنا عندي مشكلة في الثقة. ومعرفتش أقول لبابا وقتها عشان علاقتي بيه كانت مش كويسة".

وتكلمت عن والدتها قائلة: "كنت متمردة جدًا وهي مكانتش راضية عني، بس علاقتنا اتحسنت قبل وفاتها، وعمري ما هنسى إن آخر مرة شفتها كانت وهي بتتغسل، كنت نايمة في حضنها".

لبنى كمان علقت على ملابس محمد رمضان في حفله الأخير بأمريكا وقالت: "مافيش راجل يلبس كدا، أنا مشفتش التفاصيل بس الفكرة نفسها غريبة عننا".

وعن اعتزالها وارتدائها الحجاب زمان، قالت: "الحجاب فرض وبيحفظ المرأة، وأنا بحاول أوصل لربنا بطريقتي، ولما توصلي صح، بتفهمي دينك صح".

واختتمت كلامها بقرارها اللي ندمت عليه: "التمثيل كان أكتر قرار ندمت عليه، رغم النجاحات، لكن الحياة الفنية مش سهلة".