خاص| سلوى عثمان: عمرو سعد ضربني بالقلم بجد في «سيد الناس».. ووجع قلب الأم جدًا
كتب: ياسر خالد
توالت ردود أفعال عديدة بعد مشهد صفع جارحي، الذي يقوم بدوره الفنان عمرو سعد، لـ سناء التي تقوم بدورها الفنانة سلوى عثمان، بمسلسل سيد الناس، الذي يتم عرضه عبر منصة شاهد وقناة mbc مصر خلال ماراثون دراما رمضان 2025، محققًا نجاحًا كبيرًا.
تواصل موقع نبض الخبر مع سلوى عثمان، التي تحدثت لنا عن هذا المشهد الصعب والمؤثر، والذي حظى بنسبة مشاهدة مرتفعة للغاية.
سلوى عثمان: «جارحي كان واثق في سناء جدًا بس حس إنها خذلته فاضطر يضربها»
فعن المشهد قالت سلوى: هو مايعرفش إني أمه وأنا اللي عارفة، فهو كان واثق فيا جدًا، وأنا اللي مربياه وبيحبني جدًا بس مش عارف إني أمه، فحس إني خذلته لما اعتماد طلعت الأسورة، فهو حس طبعًا إنه كان بيدافع عني وأنا مع ذلك خذلته فاضطر يعمل كده.
أضافت: فطبعًا دي وجعت الأم جدًا، وحتى بعد كده أنت شفت الأغنية لما كان بينصفها محمد سامي ما بيني وما بينه في المشهد، كانوا هما الاتنين متألمين، هو كمان كان متألم بس مش عارف هو متألم ليه، متضايق عشانها برضو.
كما كشفت سلوى كيف أنها تصل لهذه المرحلة من الصدق عندما تجسد دور الأم، فنشعر أنها والفنان أو الفنانة التي معها بالفعل أم وابنها أو أم وابنتها، قائلة: هو أكيد أنا زمايلي كلهم بحبهم جدًا، وخصوصًا إن لما مثلًا أبقى طالعة أم حد فيهم.
أكملت: سواء بنوتة أو شاب، بحاول إن أنا وهو أو أنا وهي جوه الكواليس نبقى قريبين من بعض، وببتدي أحس إني أم فلان أو أم علان، فبنقرب المسافات من بعض علشان خاطر لما نيجي نشتغل يبقى باين أوي إنه حقيقي.
حول ما إذا كانت تشعر بالقلق من تجسيد دور أم لأي فنان في أي مرحلة عمرية، أوضحت سلوى: لأ لأ، الدور ده دور جميل جدًا.
أشارت: أيوه أنا نفسي أغير شوية مثلًا زي في حكيم باشا، أنا مغيرة فيه وعاملة صعيدية وست متجوزة وماكياج غير سناء، لافتة: بس دور الأم بيبقى قريب أوي لقلوب الناس، فده شيء جميل إني أبقى قريبة لقلوب الناس.
سلوى عثمان: «الشعب المصري دمه خفيف ولما بشوف الكوميكس مش بتضايقني ومعناها إني لفت نظر المشاهد»
عن كوميك لسه ماطفحناش اللقمة، كشفت أنها تسعد بهذه الأمور، مشيرة إلى أن هذه الكوميكس تعني أنها لفتت نظر المشاهد، مُعلقة: وفيه كمان كوميك قبله حلو برضو، أنا وريم مصطفى في الجنازة ومعلمين عليا أنا بقى، ويقولك بس هو رمضان كده وصل رمضان جه.
مضيفة: فيه حاجات أنا بشوفها لذيذة، الشعب المصري دمه خفيف، فلما بشوف الكومنتات دي أو الكوميكس دي، فأنا بتبسط مافيش حاجة بتضايقني.
لفتت: لأن بالعكس معنى كده إني أول حاجة لفتت نظره، يعني أنا بالنسبة له موجودة جدًا وبيهزر معايا، بيقول حاجة كوميدي علشان يفرفش بيها الدنيا، فده مابيزعلنيش الحقيقة.
بخصوص تقديمها لدور زوجة الأب في مسلسل جت سليمة، والتي كانت تختلف تمامًا عن أدوار الأم الطيبة التي برعت فيها، قالت: بس كانت دمها خفيف، آه هي صحيح رزلة بس رزلة بخفة دم.
تابعت: لأن المسلسل كله كان خفيف وكوميدي، فلازم ناخدها من نفس السكة، وده حلو إن الممثل يغير لأكتر من شكل ودور.
أعربت سلوى عن سعادتها بتصدرها للتريند مرتين خلال الأسبوع الأول من رمضان، قائلة: والله دي حاجة بتسعدني وحياة ربنا، أنا بتبسط إن الناس حابة الشغل ومتابعاني ومتابعة شغلي ومبسوطة بيا.
واصلت: ده في حد ذاته شيء يسعد، إحنا بنشتغل علشان الجمهور يبقى مبسوط، ونقدمله حاجات تسعده ويتفرج عليها أو يتعلم منها، فطبعًا ببقى سعيدة إني قريبة للناس بالشكل ده.
فيما يتعلق بما إذا كانت ترى أن السيناريست عمرو ياسين كان يستشرف المستقبل حول الـAi، عندما قام بكتابة حكاية بدلة جديدة ضمن حكايات مسلسل نصيبي وقسمتك 3، والتي شاركت في بطولتها، أوضحت سلوى: ممكن جدًا ليه لأ.
سلوى عثمان عن تعاونها مع إلهام شاهين بعد غياب: «بقدرها جدًا كفنانة ونجمة كبيرة»
أيضًا تحدثت سلوى عثمان عن فيديوهات المزاح، التي جمعتها بالفنان حسن الرداد والفنان أحمد زاهر خلال كواليس تصوير مسلسل محارب في رمضان الماضي، قائلة: إحنا بنبقى عاملين زي الأسرة الواحدة أو العيلة الواحدة.
أردفت: كمان إحنا كلنا اشتغلنا مع بعض أكتر من مرة، وبنطلع أخوات وأمهات، تحس إننا عارفين بعض أساسًا لما بنيجي نشتغل تاني مع بعض، إحنا بنعتبر نفسنا أسرة مع بعضينا على رأي خالد الصاوي، بجد بنبقى كده دي حقيقة.
كما أشادت بالفنان خالد الصاوي ودوره في مسلسل سيد الناس، قائلة: وخالد الصاوي طبعًا السنة دي منورنا في سيد الناس، عامل دور لذيذ جدًا، فالحمد لله إن ربنا وفقنا.
كذلك تحدثت سلوى عن تعاونها مع الفنانة إلهام شاهين بعد غياب طويل، قائلة: إحنا الاتنين حبايب، إحنا حبايب أوي، وقبل كده كنا طالعين إخوات في البراري والحامول.
استكملت: فأنا والهام حبايب وأنا بحبها جدًا وبقدرها جدًا كفنانة ونجمة كبيرة ليها تقديرها، وطبعًا منورة المسلسل ومنورة الدنيا، فطبعًا الحمد لله إننا هنا في حالة لذيذة جدًا مع بعض.
إلى جانب ذلك كشفت سلوى عثمان عن كيفية وصولها والفنانة إلهام شاهين إلى مرحلة الكراهية بين اعتماد وسناء، التي شاهدناها في المسلسل، قائلة: لما بتدخل قدام الدور واللبس والشخصية، وكل الحالة اللي حواليك لازم بتتقمص الدور.
اختتمت سلوى عثمان حديثها، قائلة: فجوه المشهد بتبقى هي اعتماد وأنا سناء، فلازم جوه الشخصية وجوه اللوكيشن وجوه ديكور، لازم تبقى الشخصية جوانا.
