إلهام شاهين لـ نبض الخبر: «اعتماد مش بس شريرة.. عندها عنف وغل وردود أفعالها عنيفة جدًا»

كتب: ياسر خالد 

تخوض النجمة إلهام شاهين ماراثون دراما رمضان 2025 بمسلسل «سيد الناس» مع النجم عمرو سعد، والذي حقق نجاحًا كبيرًا منذ عرض الحلقة الأولى منه، وقد لاقت شخصية اعتماد الهواري، التي تجسدها في العمل، نجاحًا كبيرًا وردود أفعال إيجابية من جانب الجمهور.

تواصل موقع نبض الخبر مع إلهام شاهين، التي كشفت لنا عن كواليس تجسديها لشخصية اعتماد في سيد الناس، كما أعربت عن سعادتها الكبيرة بردود أفعال الجمهور على المسلسل ودورها فيها.

إلهام شاهين: «بحس إن اعتماد مش بس مابتحبش ابن جوزها حتى عيالها مابتحبهمش»

فعمّا إذا كانت ترى اعتماد هي الأكثر شرًا أم شخصية ناهد الوكيل في مسلسل نصف ربيع الآخر، من بين أدوار الشر التي قدمتها في الدراما، أوضحت: «لا فيه بطلوع الروح أم جهاد زعيمة داعش، وفيه زمان حاجة اسمها امرأة من نار برضو كانت شريرة جدًا».

مشيرة: «بس اعتماد مش بس شريرة، اعتماد أكثرهم عنفًا وغلًا، اعتماد غلاوية وعنيفة وردود أفعالها عالية أوي، مختلفة عنهم مش شبه أي شخصية عملتها فيها شر».

كشف إلهام عن مبرر الشخصية في شرها، قائلة: «هي مبررها إنها عمرها ماتحبت، الراجل ماحبهاش، آه راح اتجوز عليها وجابلها عيل، وقالها تربيه غصب عن عينك وماتسألينيش مين أمه وإذا كان عاجبك، هو مش باقي عليها».

لافتة: «هو اتجوزها صغيرة أوي وخلاص عاشت هي دي الحياة، وعاملها معاملة سيئة جدًا، معاملة الجواري، والكسرة اللي هو عملها فيها هي بتحاول تظهر بعكسها قدام الناس».

أكملت إلهام: «هي بتحاول تقول أنا قوية، فدايمًا ردود أفعالها عنيفة وجواها غل كبير، لأنها ست ماعندهاش أي سعادة في حياتها»، مشيرة: «مجروحة، بس ده خلاها مش بس مابتحبش ابن جوزها، أنا بحس إن حتى عيالها مابتحبهمش».

إلهام شاهين: «بفكر في الدور وبس وماعنديش مانع أطلع أكبر من سني» 

عن خفة ظل النجم أحمد رزق أمامها في المشاهد، قالت: «ده شربات كان بيضحكني جدًا جدًا، لذيذ جدًا جدًا، من ألذ الشخصيات في المسلسل».

كما كشفت عن شعورها بتصدر المسلسل التريند منذ عرض الحلقة الأولى منه، قائلة: «الحمد لله»، مضيفة: «هي الحقيقة من أول حلقة رد الفعل رائع عند الجمهور، بس من أول ما نزل البرومو من قبل الحلقات وإحنا تريند».

حول شعورها بالتعاون مع النجم خالد الصاوي بعد فترة من الغياب، منذ تعاونهما في فيلم نحب عيشة الحرية، قالت: «إحنا عملنا مع بعض كذا حاجة أنا وخالد»، مشيرة: «خالد ممثل جميل أنا بحبه جدًا جدًا، ممثل رائع ومتميز، وهو أظبط واحد في دور رشدي أبو العباس».

أيضًا تحدثت إلهام شاهين عن تجسيدها دور والدة النجم أحمد فهيم والنجم أحمد رزق، قائلة: «ده أكتر تعليق جالي من كل البشر، سواء على السوشيال ميديا على الصفحات بتاعتي، على الواتس آب من الناس اللي يعرفوني شخصيًا، أو من الصحافة والإعلام».

أردفت: «ده تعليق كل الناس بتقولهولي»، موضحة: «ده مايقولوهوش ليا أنا يقولوه للمخرج، لأن الكاستينج ده شغلة المخرج».

بخصوص تكيفها مع الأمر وتقديم الدور ببراعة، قالت: «أنا بفكر في الدور وبس، وطول عمري مابخافش أطلع كبيرة ولا أطلع صغيرة، زي ما فيه فنانات يحبوا يطلعوا أصغر من سنهم، ماعنديش مانع أطلع أكبر من سني، دي مابتشغلنيش خالص أنا يهمني الدور نفسه».

لفتت إلى أنها جسدت دور والدة النجم أشرف عبد الباقي في فيلم خالي من الكوليسترول، قائلة: «وده من زمان، أنا بيني وبين أشرف سنة».

فيما يتعلق برغبتها في المغامرة وتقديم الأدوار غير المتوقعة أو المفاجئة، قالت إلهام: «هي دي أكتر حاجة بهتم بيها في اختياراتي، إنه يكون شيء غير متوقع»، مشيرة: «لو الجمهور توقع مقدمًا أنا هعمل إيه أكيد مش هعمل الدور».

كذلك تحدثت عن عدم تقديمها إعلانات تجارية خلال مشوارها، قائلة: «عمري ما عملت إعلانات في حياتي»، كاشفة عمّا إذا كان من الممكن أن تقدمها في حال إذا ما عرضت عليها فكرة جيدة، حيث قالت: «مش عارفة، اتعرض عليا وضيعت فرص ماكنتش مقتنعة بيها أوي».

أما عن خوضها تجربة الإنتاج إلى جانب جانب التمثيل، الذي لطالما صالت وجالت فيه، وعمّا إذا كانت قد فكرت بخوض تجربة الإخراج قالت إلهام: «لأ ماخطرش في بالي، مع إني دارسة إخراج، أنا البكالوريوس بتاعي في التمثيل والإخراج».

بالإضافة إلى ذلك، كشفت إلهام شاهين عن إمكانية تكرار تجربة الإنتاج مجددًا، قائلة: «ممكن طبعًا، مشيرة إلى ما إذا كان يمكن أن تنتج أفلامًا تجارية»، حيث قالت: «لأ ماعتقدش، أنا بعمل حاجة لتاريخ السينما، مش بعمل حاجة مؤقتة لـ إلهام، بعمل حاجة للسينما نفسها مش لـ إلهام، لأني بحب السينما».

إلهام شاهين: «مش هتواجد لمجرد التواجد وأقول هو ده المتاح»

أضافت متحدثة عن تقديمها مسلسل بطلوع الروح في عام 2022 ثم مسلسل ألفريدو في عام 2023 ثم سيد الناس في عام 2025، وأن غيابها لعام ونصف أو عامين تعد فترة طويلة بالنسبة لنجمة بحجم إلهام شاهين، حيث قالت: «مش حاسة إن ده يضايقني، أنا مش هظهر لمجرد الظهور».

مضيفة: «مش هقبل لمجرد التواجد وأقول هو ده المتاح أو هو ده الموجود مش هعمل كده أبدًا، أنا دايمًا عايزة أبقى مفاجأة للناس»، لافتة: «وكل الأدوار اللي أنت قولتها دي مفاجآت، سواء كان ألفريدو دور مريضة الألزهايمر كان مفاجأة كبيرة للناس إني أعمل دور زي ده».

تابعت إلهام: «الدور كله كان مفاجأة للناس، والدور اللي قبله أم جهاد في بطلوع الروح كان مفاجأة المفاجآت ماحدش متخيل، فأنا بختار أدواري بعناية فائقة، مابشتغلش إلا لما يبقى فيه دور جديد ومختلف وفيه مجهود ممثل، عمرك ما هتلاقي ليا أدوار كده تمر مرور الكرام».

واصلت: «فيه 45 مسلسل في رمضان، لكن أنا من أول رمضان تليفوني مابطلش رن، والرسايل والتعليقات وتريند، ليه؟ طيب ما هو فيه مسلسلات كتير، أنا مابعملش حاجة إلا لما تبقى جديدة ومفاجأة للناس ومش متوقعينها مني، فبتبقى صدمة».

كشفت إلهام شاهين عن سر إتقانها للغة العربية، الذي ظهر خلال بعض الجمل على لسان شخصية أم جهاد في مسلسل بطلوع الروح، وكذلك في مسرحية مع النجم الراحل نور الشريف، حيث أوضحت: «لما بندرس الفن، أنا درست في أكاديمية الفنون، عندنا مواد أساسية خاصة باللغة العربية، وعندنا مادة إلقاء».

استكملت: «الإلقاء ده بيعلم كل مخارج الألفاظ، وعندنا مادة اسمها صوتيات، مواد بتُدرس بقعد أدرس فيها أربع سنين باخد فيها بكالوريوس، فأكيد كل ده فادني، وأنا من وأنا صغيرة الحقيقة أنا بحب اللغة العربية جدًا وشاطرة فيها».

اختتمت النجمة إلهام شاهين حديثها قائلة: «دايمًا كنت أنا في المدرسة اللي أقرأ النصوص، أي شعر أنا اللي أقرأه علشان اللغة العربية وعلشان التشكيل أنا شاطرة فيه، أنا مثلًا في حصة الدين أنا اللي أقرأ القرآن، لأني برضو شاطرة في النطق وفي التشكيل، شاطرة في اللغة العربية».