ياسمين علي لـ«نبض الخبر»: بعد مأساة كلب المحلة.. الرحمة بقت عملة نادرة والمجتمع محتاج يتربى من أول وجديد

كتبت: مها صابر راشد 

أعربت الفنانة ياسمين علي عن استيائها من الحالة المجتمعية التي ظهرت على خلفية واقعة "كلب المحلة"، مؤكدة أن ما حدث ليس فقط عنفاً تجاه الحيوان، بل هو دليل على خلل أعمق في الأخلاق والنخوة.

وقالت الفنانة ياسمين علي في تصريحات خاصة لموقع "نبض الخبر": "المجتمع محتاج توعية أكتر، إحنا مش بنتكلم عن حيوان بس، إحنا محتاجين نرجّع النخوة اللي كانت عند الرجالة زمان، النخوة اللي فيها شهامة وجرأة وشجاعة وإحساس، لما دي تبقى موجودة، مافيش ولد هيطلع مش متربي، وهيبقى فيه رجالة تعرف تقومه".

وأضافت:"أنا طول عمري بخاف من الكلاب والقطط، لكن عمري ما أذيتهم لما جات لية قطة هدية، حسيت إنها بتحس بيا أكتر من البني آدمين القطة كانت بتعيط معايا وبتفرح معايا، ودي حاجة عمري ما شفتها قبل كده."

وتابعت:"الكلاب كمان، عمرهم ما أذوني في جراوي عندي في الجراج كانوا بيحبوني من غير ما أقدم لهم أي حاجة، بس علشان كنت بسلم عليهم الكائنات دي بتحس، وبترد بالإحساس، مش بالأكل بس."

وأشارت إلى أن الإعلام والمجتمع ينشران صورة مشوهة عن الحيوانات

 قائلة:"طول عمري بخاف من الكلاب علشان الأخبار اللي بتقول إن كلب عض حد أو جرى ورا حد لكن لما قربت منهم، لقيتهم طيبين حتى الكلب اللي عض حد قريب، فضل ماشي جنبي وما عملليش أي حاجة."

واختتمت ياسمين تصريحها برسالة إنسانية

قائلة:"بس لازم نرحم الحيوانات، لازم نرحم البني آدمين كمان لازم نعلمهم ونربيهم من الأول الرحمة مش بس للحيوان، الرحمة تبدأ من تعاملنا مع بعض".