كندا علوش: ماكنتش مخططة أعيش في مصر.. وعمرو يوسف بيديني ثقة وبيسهل عليا الحياة

كتب: ياسر خالد 

أقيمت، صباح اليوم، ندوة تكريم النجمة كندة علوش بمهرجان أسوان الدولي لسينما المراة، بحضور كوكبة من نجوم الفن البارزين. 

خلال الندوة تحدثت عن أول أفلامها في مصر فيلم ولاد العم، حيث أوضحت أن الفضل في مشاركتها فيه يعود للمخرج شريف عرفة، بعد اختياره لها بعدما أجرت أوديشن لدور دارين الفلسطينية.

قالت كندة: الأستاذ العظيم شريف عرفة جه سوريا يعمل أوديشن عشان يختار ممثلين، وأصدقائي قالولي فيه أوديشن بنعمله مع أستاذ شريف عرفة، فأنا قلت طيب ما أجرب بس ماكنش في بالي خالص إني ممكن أتقبل، كان دور فلسطينية دور دارين.

أردفت: فلما رحت أستاذ شريف عرفة قال آه تمام، فقلت هو الموضوع هيبقى بجد ولا إيه، كان فيه الأستاذة كريم عبد العزيز، منى زكي وشريف منير، صورنا الفيلم في جنوب أفريقيا وفي مصر وفي سوريا.

كندة علوش: كنت فاكرة إن ولاد العم تجربة وخلاص وماكنتش أعرف إني هستقر بعده في مصر 15 سنة

تابعت كندة علوش: وهناك شفت الأستاذ هشام عبد الخالق المنتج، فقالي يلا جاهزة تيجي مصر؟، قلتله ليه آجي مصر، قالي علشان تشتغلي، قلتله أنا بجرب الفيلم ده وخلاص أنت ليه بتقول كده؟.

موضحة أنها لم تكن مخططة أن تأتي إلى مصر، ليس لأنها لا ترغب في المجيء إلى مصر ولكن لأنها لم تكن تتخيل بعد أنها ستأتي إلى مصر وتستقر بها، لافتة إلى أن هشام عبد الخالق قال لها: أنتي بعد الفيلم ده هتيجي وتعيشي وأنا هفكرك، وهقعد معاكي بعد كام سنة وهفكرك إن الفيلم ده هيبقى خطوة وهتندهك النداهة وهتفضلي قاعدة في مصر.

علقت كندة على كلام هشام عبد الخالق لها: وأهو بقالي دلوقتي 15 سنة، وأضافت ضاحكة: وقعدت واتجوزت وخلفت وكل حاجة بقت هنا في مصر.

كندة علوش: عمرو يوسف عنده نظرة إيجابية للحياة ودايمًا بيسهل عليا الدنيا 

عن دور النجم عمرو يوسف، زوج كندة علوش، في دعم مسيرتها كممثلة، قالت: عمرو داعم جدًا جدًا جدًا ويديني ثقة، أنا ساعات ببقى متخوفة جدًا، أنا قلوقة، لكن عمرو واثق من نفسه، لما بياخد قرار بيبقى مسئول عنه، لكن أنا قلوقة وبنتقد نفسي كتير لما بتفرج على نفسي.

واصلت كندة علوش: عمرو بيديني الثقة وبيطمني، لما ببقى مترددة في حاجات بيديني دفعة، لما بيبقى عندي تخوفات إني أسيب العيال وأنزل أشتغل، هو بيحسسني إني هقدر أعمل ده وهتنجحي فيه.

أشارت: زائد إنه عمرو بشكل عام إيجابي، هو لما بيجي من الشغل حتى لو عنده مشاكل بيبقى مبتسم، فهو بيسهل عليا الحياة، كوني أنا شوية شخص قلوق إنما هو بيبسط الدنيا بالنسبة لي أكتر. 

آخر أعمال كندة علوش

يذكر أن آخر أعمال النجمة كندة علوش مسلسل إخواتي مع النجوم نيللي كريم، روبي، حاتم صلاح، جيهان الشماشرجي وعلي صبحي، الذي عرض خلال ماراثون دراما رمضان الماضي ولاقى نجاحًا كبير، وهو سيناريو وحوار مهاب طارق، إخراج محمد شاكر خضير وإنتاج شركة ميديا هب للمنتجين محمد السعدي وإيهاب جوهر والشركة المتحدة للخدمات الإعلامية.