رانيا منصور تكشف تفاصيل مشاركة توأمها نورهان في نصيبي وقسمتك
كتب: ياسر خالد
حلت كل من النجمة رانيا منصور وتوأمها النجمة نورهان منصور ضيفتين مع الإعلامية منى الشاذلي ببرنامج معكم المذاع عبر on، في حلقة مميزة تحدثتا فيها عن مشوارهما الفني وعلاقتهما ببعضها البعض.
خلال الحلقة كشفت رانيا منصور تفاصيل مشاركة نورهان في نصيبي وقسمتك، موضحة أن الأمر جاء بالصدفة، إذ كانت هناك فنانة أخرى مرشحة للدور لكن أمرًا ما حدث لها لتعتذر قبل التصوير بيوم واحد.
قالت رانيا: إحنا ماكناش مقررين من البداية إن إحنا الاتنين هنمثل، يعني نورهان كانت متخيلة إنها لما هتدخل الجامعة معايا فيه أقسام تانية، زي الإخراج، زي الديكور، فيه أقسام تانية في قسم المسرح، لما بدأت تدرس تمثيل حبت الموضوع.
أضافت: بس برضو لما أنا قررت بقى هسافر القاهرة وهمثل واخد الموضوع بجد وهكمل، قعدت أمثل شوية، بعدين في مسلسل نصيبي وقسمتك كان أصلًا فيه حد تاني مترشح إنه يعمل الدور اللي نورهان عملته.
أردفت: كانت صدفة بجد، كانت الممثلة اللي مترشحة للدور حصلها حاجة أو كده، فاعتذرت قبل التصوير بيوم واحد، وأنا كنت قاعدة أنا والمخرج، فقعد يدردش معايا، وبعدين بيقولي بس أنتي لما بقابلك في الجيم بتتمرني كويس أوي، قولتله أنا بقابلك في الجيم، أنهي جيم ده اللي أنا بشوفك فيه.
تابعت رانيا: فبسأله أنهي جيم، فعرفت إن نور هي اللي بتروح نفس الجيم، فقالي إيه ده هو أنتي عندك أخت توأم، قولتله آه أنا عندي أخت توأم، فسكت كده شوية قالي هي تحب تمثل، قولتله بص هي دارسة تمثيل.
أشارت: إحنا كنا بنفكر إننا نفسنا نعمل عمل يبقى فيه إحنا الاتنين طالعين بدور أختي توأم، لأن متهيألي دي حاجة ماحصلتش، يعني دايمًا لما بيبقى فيه مثلًا عمل، وبيبقي فيه شبيهة للفنانة أو عندها أخت توأم هي بتعمل الدورين، بس إن يبقى فيه أختين فعلًا توأم هما اللي يعملوا الدورين، ماحصلتش قبل كده، فقالي خلاص إحنا نخلي الدور مش أختين عاديين، نخليهم أختين توأم وهي تعمل الدور، هي فين بقى دلوقتي.
أكملت رانيا منصور: فبكلمها طلعت في مكان قريب، لتعلق نورهان مازحة: جابوني على ملا وشي، لافتة: وأنا وقتها كنت بتفرج على مسلسل على نتفليكس اسمه black mirror، وكان فيه حدوتة من الحواديت بتاعته كان فيها رعب، كانت عاجباني أوي قصة كان فيها شخصية روبوت.
اختتمت نورهان منصور تصريحاتها: فطبعًا قرأته، الله يا رانيا جميل، ربنا يوفقك يا حبيبتي وخلاص، فلما كلموني المخرج قالي طيب أنتي بقى محتاجة وقت تقرأي وإحنا مستعجلين، قولتله لأ أنا قارية السكريبت، فسبحان الله الموضوع كان متسهل بشكل غريب جدًا، وده اللي حسسني طول الوقت إن فيه باب بيتفتح، يعني ربنا عايز إني أكون موجودة في العمل.
من هم أبطال مسلسل نصيبي وقسمتك 3 - بدلة جديدة؟
يشار إلى أن مسلسل نصيبي وقسمتك 3 - بدلة جديدة تم عرضه في عام 2019، وشارك في بطولة المسلسل نخبة من النجوم والفنانين البارزين، منهم شريف سلامة، رانيا منصور، نورهان منصور، سلوى عثمان، محسن صبري وغيرهم.
المسلسل من تأليف عمرو محمود ياسين، إخراج محمد جمعة وإنتاج شركة آرت ميكرز للمنتج أحمد عبد العاطي.
آخر أعمال رانيا منصور
كان آخر أعمال الفنانة رانيا منصور مسلسل شباب امرأة مع الفنانة غادة عبد الرازق، والذي عرض خلال موسم رمضان الماضي وتألقت خلاله بشخصية غالية، وقد لاقى المسلسل نجاحًا ملموسًا.
آخر أعمال نورهان منصور
يذكر أن آخر أعمال الفنانة نورهان منصور مسلسل قهوة المحطة، الذي عرض خلال ماراثون رمضان الماضي وشارك في بطولته كوكبة من النجوم والفنانين، من بينهم أحمد غزي، بيومي فؤاد، رياض الخولي، أحمد خالد صالح وانتصار، وتألقت خلاله بشخصية دكتورة داليا وقد حقق العمل نجاحًا كبيرًا.
