خاص لـ نبض الخبر.. رانيا منصور: «لأول مرة» بيناقش العلاقات ما بين الأزواج
كتب: ياسر خالد
تشارك الفنانة رانيا منصور في فيلم «لأول مرة» مع الفنان عمر الشناوي والفنانة تارا عماد، والذي يتم عرضه بالسينمات حاليًا، كما شارك مؤخرًا بمهرجان الأقصر للسينما الأفريقية.
تواصل موقع نبض الخبر مع رانيا منصور، التي حدثتنا عن تجربتها في الفيلم ودورها فيه، كما حدثتنا عن دور ميرنا الذي جسدته في مسلسل «رقم سري» مع الفنانة ياسمين رئيس، والذي تم عرضه مؤخرًا عبر قناة «dmc».
بشأن شعورهم بالقلق كفريق عمل من مناقشة الفيلم لقضية حساسة تتعلق بمرض الإيدز، أوضحت رانيا: «ماقلقناش لأن الفيلم أصلًا مش بيناقش مرض الإيدز، هو بيناقش العلاقات ما بين الأزواج، فبعيد خالص مافيش علاقة».
رانيا منصور: «بنورّي من خلال الفيلم شكل العلاقة بين الأزواج حتى بالرغم من وجود العنف الأسري»
حول كون هذه القضية حصلت على حيزًا كبيرًا من برومو الفيلم، مما جعل الناس يعتقدون أنه يناقش الأمر، صرحت: «آه بس دي بتحصل كجزء من الحدث، مش هي الموضوع بتاع الفيلم خالص».
أشارت رانيا: «الحدث فيه دي علشان تبين إيه شكل العلاقة ما بين الأزواج، مش هي النقطة الفيصلية في الفيلم».
عن تقديمها لشخصية زوجة تتعرض للعنف الأسري، أوضحت: «هي قضية موجودة، بس إحنا بنورّي برضو من خلال الفيلم شكل العلاقة الزوجية، حتى بالرغم من وجود الموضوع ده».
مضيفة: «يعني بالرغم من وجود الحدث ده، بس هو النقطة الأساسية في موضوع الفيلم عن العلاقات بين الأزواج».
رانيا منصور عن العنف الأسري: «مافيش حد يرضى بكده حتى لو بغرض المحافظة على البيت والأولاد»
وجهت رانيا نصيحة للسيدات اللواتي يتعرضن للعنف الأسري، قائلة: «مافيش حد عاقل يرضى بحاجة زي كده أو يوافق على حاجة زي كده».
فيما يتعلق بأن بعض السيدات اللواتي يقبلن بالأمر، من أجل الحفاظ على بيتهن وأولادهن، قالت: «آه طبعًا فيه كده، ماقدرش أنكر إن ده مش موجود».
مشيرة: «بس مافيش حاجة في الدنيا تشجع حد إنه يقبل إنه يبقى متهان، حتى لو كان بغرض المحافظة على الحياة الزوجية والبيت».
أردفت رانيا: «ده وضع ماحدش يتقبله طول ما هو موجود، يعني الزوج مثلًا بيمارس العنف ضد مراته والوضع ده موجود طول الوقت، والوضع ده نوافق بيه بس علشان خاطر البيت والأولاد، أكيد دي حاجة مافيش حد سوي بصراحة يقبلها».
لافتة: «لكن بيحصل بعدها إن الشخص بيندم، يعني إزاي أنا عملت كده في لحظة مش صح أيًا كان، ماشي ممكن ساعتها الواحد يتقبل الاعتذار مثلًا أو يتقبل إن ده مش هيتكرر تاني، لو حس فعلًا بالصدق في كلام الشخص ده».
أضافت رانيا: «لكن لو شخص مش حاسس أصلًا إنه غلطان وإنه بيعمل حاجة غلط في حق، الحياة ساعتها بصراحة هتبقى مستحيلة».
رانيا منصور: «توانا بنتي بتمثل مع تامر في ريستارت لكن أنا ضيفة في الفيلم»
أيضًا تحدثت رانيا عن مشاركتها مع ابنتها توانا الجوهري بفيلم ريستارت مع الفنان تامر حسني، قائلة: «توانا بس اللي بتمثل مع تامر، لكن أنا بس بطلع في مشهد واحد، يعني ضيفة مش دور أساسي».
رانيا منصور: «ميرنا في رقم سري طموحة بس طموحها بيبررلها إنها تعمل حاجات أخلاقيًا مش صح»
أما عن رأيها في شخصية ميرنا التي جسدتها بمسلسل رقم سري، فكشفت: «أنا شايفاها إنها بنت عندها طموح، بنت بسيطة من حي شعبي، زي ما عرفنا في أحداث المسلسل قدام، فهي عندها طموح إنها تبقى في مكان أحسن في حتة أحسن».
مضيفة: «بتشتغل في البنك فعينيها على المنصب اللي لقاء فيه وبعد كده تبقى المديرة، بس طموحها ده بيبررلها إنها تعمل حاجات أخلاقيًا إحنا ممكن نشوف إنها مش صح».
لفتت رانيا: «زي موضوع الاختلاس ده، إنها كانت متفقة مع مجدي ومع ندى المديرة اللي ماتت، إنهم يختلسوا، يعني طموحها مخليها تروح في حتة مش سوية شوية، زي إنها طول الوقت بتغير وبتنفسن من أي حد ممكن يبقى في منصب هي عينيها عليه».
تابعت: «فهي ميرنا كده بمنتهى البساطة، والشخصية دي موجودة ونشوفها، يعني فيه ناس عندهم طموح آه، بس طموحهم مش بيخليهم يجتهدوا على أد ما هم ينفسنوا من الناس اللي حواليهم، ممكن يعملوا حاجة أخلاقيًا مش صح، بنشوف ده موجود شخصية موجودة حوالينا».
رانيا منصور: «ميرنا كانت بتستخدم كل اللي حواليها كسلمة علشان توصل لطموحها»
أوضحت أن ميرنا كانت تستغل كل الظروف لصالحها، قائلة: «ميرنا هي واحدة بتستغل كل الظروف، علشان تنط نطات تغير من الواقع اللي عايشاه».
عما إذا كانت ميرنا تستخدم زملائها في العمل كسلم، قالت رانيا: «بالظبط، وهي قالت نفس التعبير على لقاء، وده بيبرر ساعات إن لما واحد ينتقد حاجة في حد، بيبقى كأنه بيوصف نفسه، يعني مثلًا لما يقولك دي بخيلة أوي، وكأنه بخيل بس مش عاوز يشوف الناس إلا من النضارة بتاعته».
موضحة: «فنفس الحكاية هي بتقول على لقاء هي بتستغل كل اللي حواليها وبتستخدمهم كسلمة علشان توصل لطموحها، هي دي طريقة ميرنا بالظبط إنها بتعمل كده».
أشارت رانيا منصور: «هي لو شافت إن علاقتها مثلًا بـ محمد عبده، لو هما مثلًا ارتبطوا ببعض، ممكن تساعدها إنها تنقل لمرحلة أحسن بتعمل كده».
لافتة: «لو شافت إن علاقتها بالمدير ممكن تأمنها، إنها تبقى في أمان وإنه مثلًا مايدورش وراها، فيكتشف موضوع الاختلاس اللي هما عاملينه مع ندى، نفس شخصية البنت اللي بتخلي علاقتها وطيدة بالمدير بتاعها علشان تبقى مرتبطة بالكرسي».
رانيا منصور: «فيه تشابه ما بين ميرنا وهالة في الوصفة السحرية»
اختتمت الفنانة رانيا منصور حديثها، كاشفة ما إذا كان هناك تشابه بين ميرنا وشخصية هالة، التي قدمتها في مسلسل الوصفة السحرية، حيث قالت: «ممكن، آه ده فيه تشابه، باختلاف طبعًا الشخصية، آه فيه تشابه ما».
