من الصحافة للتمثيل« غادة طلعت»: مش بعمل شو علشان فاهمة دماغ الصحفيين
كتب: ياسر خالد
تألقت الفنانة غادة طلعت، خلال ماراثون دراما رمضان الماضي، في مجموعة من الأعمال الدرامية، التي حققت من خلالها نجاحًا كبيرًا ونالت عن أدوارها فيها إشادات واسعة من جانب الجمهور.
في هذا السياق، حلت غادة طلعت، أمس، ضيفة مع الإعلامي خيري رمضان ببرنامج مع خيري المذاع عبر قناة المحور، للحديث عن الأعمال التي شاركت فيها وتألقها في الأدوار التي جسدتها فيها خلال رمضان الماضي.
كما تطرقت أيضًا بالحديث عن بدايتها الفنية، وعملها بالصحافة قبل أن تتجه بعد ذلك نحو الفن، وكذلك عن الفرق بين كلا المهنتين.
فعن بدايتها في الصحافة والفرق بين الفن والصحافة، قالت غادة: هما الاتنين مهنتين بيعتمدوا على الموهبة، لو حضرتك مش موهوب في الصحافة وعاشق للصحافة مش هتقدر تكمل أبدًا، لأنها مهنة ممتعة آه وبتحقق مجد لما بتكون أنت ناجح، لكنها مهنة شاقة والعائد الماضي فيها قليل جدًا، فلازم تكون أنت بتحبها علشان تدفع الأثمان حرفيًا.
أردفت: ومهنة صعبة لأنها أنت طول الوقت ماعندكش شيفت، ماعندكش جزء من اليوم بتشتغل صحفي والباقي تبقى إنسان عادي، بتشتغل الـ24 ساعة، أنت صحفي فأنت بتغطي وطول الوقت مكلف إنك تقدم الأخبار للجريدة أو الموقع أو المؤسسة اللي أنت بتشتغل فيها، فهي صعبة جدًا وممتعة كمان للي بيحبها.
لفتت: والتمثيل كمان مش سهل أبدًا، التمثيل ممتع جدًا بس في اللحظات اللي أنت بتمثل فيها، هي دي الممتعة، وممتع في وقت تلقي رد الفعل من الجمهور لما تنجح، لكن طول رحلة البحث عن دور وعن فرصة ده عناء وشقاء كبير جدًا.
أما عن تبديلها للمقاعد بين الفن والصحافة، قالت غادة: تبديل المقاعد ده مش مخليني سعيدة أوي، لأنه أنا فاهمة بزيادة، فاهمة الصحفي بيبص للفنان إزاي، وفي حاجات قد يفعلها البعض عشان يبقى يتصدر تريند أو يعمل شو، أنا بتكسف أعمل ده.
أضافت: لأنه أنا فاهمة وعارفة إن الصحفيين فاهمين إن الحركات دي أو التصرفات دي قصد صانعها أو اللي بيعملها إنه يلفت النظر، فأنا بتكسف أعمل الحاجات دي، فحاسة إن عندي مسئولية كبيرة كمان إني أختار أدوار مهمة ومحركة، وماتقللش مني أبدًا وسط كمان الوسط اللي أنا اللي خارجة منه، وسط الصحافة، فحاسة إنها مسئولية كمان.
عما إذا كان ذلك له علاقة بكون والدها صعيديًا، أوضحت غادة: والدي صعيدي دي قصة تانية بقى خالص، يعني والدي كان سبب كبير من غير ما يقصد إني أخر خطوة التمثيل، أنا طول الوقت بحاول أتجاهل حبي للتمثيل.
كشفت غادة عن العلامات التي تظهر أنها يمكن أن تصبح ممثلة تخطف الكاميرا، قائلة: من وأنا صغيرة بحب أغني، أرقص زي البنات اللي بيقعدوا قدام المراية طول الوقت بس أنا كان بزيادة، طول الوقت بقلد طول الوقت بهزر، يعني منطقة يمكن أكتر من إخواتي شوية.
واصلت: فمن وأنا صغيرة كل اللي بيشوفني بيقول إنها هتبقى فنانة، لكن أنا طول الوقت كنت بحاول أتجاهل الموهبة دي، خوفًا علشان الصورة اللي والدي حاببني أكون فيها.
اختتمت غادة طلعت تصريحاتها، قائلة: خايف عليا من المخاطر بتاعت الشغل بتاعت التمثيل، أنا حريصة أكتر منه إن صورته تبقى ناصعة البياض.
أعمال غادة طلعت الرمضانية
يذكر أن الفنانة غادة طلعت شاركت في 6 أعمال، خلال ماراثون دراما رمضان الماضي، وهي جودر 2، المداح 5، قلبي ومفتاحه، ولاد الشمس، فهد البطل وقهوة المحطة، وقد حققت من خلال أدوارها فيها نجاحًا كبيرًا ونالت أصداء إيجابية من جانب الجمهور عليها.
